नेत्रावती डबजोङमा सिकाई आदान प्रदान सम्बन्धी कार्याशाला गोष्ठि

धादिङ,२० भाद्र ।
नेत्रावती डबजोङ गाउँपालिकामा पालिका तहमा सुआहारा दोस्रो कार्यक्रमको सिकाई आदान प्रदान सम्बन्धी कार्याशाला गोष्ठि सम्पन्न भएको छ ।

सोमबार गाउँपालिकाका अध्यक्ष मेघनाथ रिजालको अध्यक्षतामा भएको कार्यक्रममा उपाध्यक्ष सितामाया गुरुङको प्रमुख आतिथ्य तथा वडाअध्यक्षहरु, सुआहाराका चिरन्जिवि दाहाल,एक्सन नेपालका कार्यकारी निर्देशक कमलराज ढुंगाना, स्वयमसेविका, हजारदिने आमा लगायतको उपस्थिति रहेको थियो ।

स्वास्थ्य शाखा प्रमुख कृष्ण बहादुर पौडेल र सुआहाराका निर्देशक चिरन्जिवि दाहालले सहजिकरण गर्नुभएको कार्यक्रममा स्वास्थ्य तथा पोषण सम्बन्धी मुख्य सूचकहरुको अवस्था, उपलब्धी र सिकाईबारे प्रस्तुतिकरण, हालसम्म प्राप्त नतिजा, उपलब्धी र सिकाई सम्बन्धी प्रस्तुतिकरण, प्रतिबद्धताहरुको समिक्षा , मुख्य समस्या, चुनौती र आगामी प्राथमिकताबारे समुहगत छलफल गरिएको थियो ।

गाउँपालिकाले स्वास्थ्य तथा पोषण सम्बन्धी क्षेत्रमा उपाध्यक्षसँग गर्भवती तथा सुत्केरी कार्यक्रमको लागि ६ लाख, गर्भवती तथा सुत्केरी पोषण भत्ता ४ लाख, गर्भवती तथा सुत्केरी आकस्मिक एम्बुलेन्स यातायात बापत ५ लाख बजेट विनियोजन गरिएको गाउँपालिका अध्यक्ष रिजालले बताउनुभयो। पोषण कार्यक्रम सुधार गर्नको लागि थप पहल गर्ने रिजालले बताउनुभएको छ ।

चालु आर्थिक वर्षमा गर्भ जाँच, सुत्केरी जाँच, बालबालिकालाई भिटामीन ए, जुकाको औषधी, बाल भिटा, गर्भवती तथा सुत्केरीलाई आईरन फोलिक एसिड र क्याल्सियम लक्ष्य अनुसारको प्रगति गर्नको लागि सबै स्वास्थ्य संस्थाबाट पहल गर्ने निर्णय भएको गाउँपालिका स्वास्थ्य शाखा प्रमुख एवम सूचना अधिकारी पौडेलले बताउनुभयो । गाउँपालिकामा विगत ३ वर्षको तथ्याङक हेर्दा पोषण कार्यक्रम सुधार भएको पौडेलले बताउनुभयो ।