भोटेकोसी बाढीमा ज्यान गुमाएका ऋणीको परिवारलाई धादिङ उद्योग वाणिज्य सहकारीद्वारा ४ लाख रुपैयाँ हस्तान्तरण

धादिङ,१३ असोज

धादिङ उद्योग वाणिज्य बचत तथा ऋण सहकारी संस्था लिमिटेडले भोटेकोसी बाढीमा परी ज्यान गुमाएका आफ्ना ऋणी दयाराम लम्सालको परिवारलाई बीमा रकमबाट ४ लाख ८ हजार रुपैयाँभन्दा बढी रकम हस्तान्तरण गरेको छ।सहकारीले आज आयोजना गरेको कार्यक्रममा संस्थाका अध्यक्ष ईश्वर धरेलले लम्सालको परिवारलाई ४ लाख ८ हजार १५ रुपैयाँ हस्तान्तरण गर्नुभएको हो। लम्सालले सहकारीबाट ३ लाख रुपैयाँ ऋण लिँदा १ हजार ५ सय रुपैयाँ बीमा शुल्क तिरेर बीमा गराउनुभएको थियो।

संस्थाका अध्यक्ष धरेलका अनुसार लम्सालको निधनपछि बीमा कम्पनीबाट क्रिया खर्चसहित ६ लाख १० हजार रुपैयाँ प्राप्त भएको थियो। त्यसमध्ये लम्सालले सहकारीलाई तिर्न बाँकी रहेको २ लाख २ हजार रुपैयाँ ऋण कट्टा गरी बाँकी ४ लाख ८ हजार ४ सय १५ रुपैयाँ परिवारलाई हस्तान्तरण गरिएको हो।अध्यक्ष धरेलले सहकारीले ऋण लगानी गर्दा ऋणीको सुरक्षाका लागि बीमासहितको ऋण प्रवाह गर्दै आएको बताउनुभयो। उहाँले भवितव्यको जोखिमलाई ध्यानमा राखेर ऋणीलाई बीमा गरेर मात्रै ऋण लिन आग्रह गर्नुभयो।उहाँले व्यवसायीहरूलाई आफ्नो पसल तथा घरको समेत बीमा गर्न आग्रह गर्नुभएको छ।सहकारीका उपाध्यक्ष बलराम खत्रीले व्यवसायीहरूको हितलाई ध्यानमा राखेर सहकारीले ऋण लगानीसँगै बीमा गर्ने व्यवस्था गरेको बताउनुभयो। उहाँका अनुसार २०७१ सालमा स्थापना भएको सहकारीमा दर्ता भएका व्यवसायी तथा कर, प्यान र भ्याटमा आबद्ध व्यवसायीलाई आवश्यक कागजात हेरेर सदस्य बनाउने गरिएको छ।

जिल्लाभर कार्यक्षेत्र रहेको सहकारी ५५ जना व्यवसायीबाट सुरु भएको र हाल करिब ३ करोड रुपैयाँको कारोबार गर्न सफल भएको उपाध्यक्ष खत्रीले जानकारी दिनुभयो।कार्यक्रममा संस्थाका संस्थापक अध्यक्ष बोधनाथ दुवाडीको प्रमुख आतिथ्यता रहेको थियो। संस्थाका अध्यक्ष ईश्वर धरेलको अध्यक्षतामा सम्पन्न कार्यक्रममा उपाध्यक्ष बलराम खत्री, महासचिव शरणकुमार श्रेष्ठ, कोषाध्यक्ष लोकप्रसाद सापकोटा, सचिव शुक्रकुमार श्रेष्ठ, सहकारीका सदस्य तथा सञ्चारकर्मीको सहभागिता रहेको थियो।