हरियाली सहकारीको अध्यक्षमा पृथ्वीनारायण श्रेष्ठ चयन

धादिङबेशी,४ असोज । नीलकण्ठ नगरपालिका–३, धादिङबेसीस्थित हरियाली बहुउद्देश्यीय सहकारी संस्था लिमिटेडको अध्यक्षमा पृथ्वीनारायण श्रेष्ठ चयन हुनुभएको छ। असोज ३ गते सम्पन्न संस्थाको २७औँ वार्षिक साधारणसभा तथा नवौँ निर्वाचन कार्यक्रमबाट श्रेष्ठको अध्यक्षतामा नयाँ कार्यसमिति चयन भएको हो।

कार्यसमितिको उपाध्यक्षमा दामोदर न्यौपाने, सचिवमा गर्भेबहादुर मिझार र कोषाध्यक्षमा गोमती खतिवडा चयन हुनुभएको छ। सदस्यहरूमा कृष्णप्रसाद रिजाल, पार्वती कोइराला, ऋषिराम ढुङ्गाना, श्यामसिंह ठकुरी र राधा लम्साल रहनुभएको छ।

साधारणसभाले लेखा समितिको संयोजकमा माधव लम्साल तथा सदस्यहरूमा अम्बिका लामिछाने र सरिता श्रेष्ठलाई चयन गरेको छ। ऋण उपसमितिका सदस्यमा सविता नगरकोटी र नन्दलाल ढकाल तथा शिक्षा समितिका सदस्यमा दान ब. श्रेष्ठ र रुपा श्रेष्ठ चयन हुनुभएको छ।

सभाले आर्थिक वर्ष २०८२/८३ को प्रगति प्रतिवेदन अनुमोदन गर्नुका साथै आर्थिक वर्ष २०८३/८४ को वार्षिक कार्यक्रम पारित गरेको छ।

संस्थाका अध्यक्ष ध्रुवप्रसाद रिजालको अध्यक्षतामा आयोजित कार्यक्रममा प्रमुख अतिथि रामचन्द्र अधिकारीले स्थानीय अर्थतन्त्र र सामाजिक क्षेत्रमा सहकारीले पुर्‍याएको योगदानको प्रशंसा गर्नुभयो। संस्थाका संस्थापक अध्यक्ष डा. मोहनबहादुर कडेल र अतिथि शिवहरि अधिकारीले सहकारीको महत्त्व, भावी कार्यदिशा तथा सामाजिक उत्तरदायित्वबारे मन्तव्य राख्नुभएको थियो।

कार्यक्रममा विभिन्न विधामा सेयर सदस्य तथा बालबालिकालाई सम्मान गरिएको थियो। गीता तिवारीले स्वागत मन्तव्य राख्नुभएको कार्यक्रमको सञ्चालन रोहिणीप्रसाद कोइरालाले गर्नुभएको थियो।

राष्ट्रिय गानबाट सुरु भएको कार्यक्रममा दिवंगत सेयर सदस्य तथा भोटेकोसी बाढीमा ज्यान गुमाएकाहरूको सम्झनामा एक मिनेट मौनधारण गरी श्रद्धाञ्जली अर्पण गरिएको थियो। सो अवसरमा गोमती खतिवडाले भोटेकोसी बाढीसम्बन्धी कविता वाचन गर्नुभएको थियो।