धादिङ क्षेत्र नं. १ मा मतगणना जारी, आशिका तामाङ अगाडि

धादिङ । प्रतिनिधि सभा निर्वाचन २०८२ अन्तर्गत धादिङ क्षेत्र नं. १ मा मतगणना जारी रहेको छ। हालसम्म गल्छी गाउँपालिका वडा नं. ५, २, ३ र ७ को मत परिणाम सार्वजनिक भएको छ।

सार्वजनिक गरिएको पछिल्लो मतपरिणाम अनुसार घन्टी चुनाव चिन्हबाट उम्मेदवार रहेकी आशिका तामाङ २ हजार ६ सय ८ मतसहित अग्रस्थानमा रहेकी छन्। उनीसँग प्रतिस्पर्धा गरिरहेका उम्मेदवारहरूमध्ये सूर्य चुनाव चिन्हका भूमि प्रसाद त्रिपाठी १ हजार ५ सय २२ मतसहित दोस्रो स्थानमा छन्।

त्यसैगरी तारा चुनाव चिन्हका राजेन्द्र प्रसाद पाण्डे ले ८ सय ४४ मत प्राप्त गरेका छन् भने रुख चुनाव चिन्हका कृष्ण रिजाल ले ७ सय ३० मत पाएका छन्।

गल्छी क्षेत्रका चार वडाको मतगणना सकिँदा घन्टी चुनाव चिन्हकी उम्मेदवार तामाङले अन्य उम्मेदवारहरूसँग उल्लेख्य मतान्तर बनाउँदै अग्रता कायम राखेकी हुन्।

निर्वाचन अधिकृतको कार्यालयका अनुसार बाँकी क्षेत्रहरूको मतगणना कार्य पनि निरन्तर जारी रहेको छ। अन्य मतदान केन्द्रहरूको मत परिणाम आउँदै जाँदा परिणाममा थप उतारचढाव आउन सक्ने बताइएको छ।

मतगणनाको थप अद्यावधिक विवरण क्रमशः सार्वजनिक गरिने निर्वाचन कार्यालयले जनाएको छ।