धादिङमा स्थानीय तहहरूको असल अभ्यास आदान–प्रदान

धादिङबेशी, २३ पौष । जिल्ला समन्वय समिति धादिङको आयोजनामा स्थानीय तहहरूको असल अभ्यास तथा सिकाइसम्बन्धी अनुभव आदान–प्रदान कार्यक्रम सम्पन्न भएको छ ।

कार्यक्रममा जिल्लाभित्रका स्थानीय तहहरूले कार्यान्वयन गरेका सफल योजना, नवीन अभ्यास तथा सेवा प्रवाहका अनुभवबारे विस्तृत प्रस्तुतीकरण गरिएको थियो । जिल्लाका सबै स्थानीय तहका अध्यक्ष तथा प्रमुखहरू एकै थलोमा भेला भई आ–आफ्ना पालिकामा भएका सफल अभ्यास, चुनौती र सिकाइका अनुभवहरू प्रतिवेदनमार्फत प्रस्तुत गर्नुभएको थियो ।

कार्यक्रमलाई सम्बोधन गर्दै जिल्ला समन्वय समिति धादिङका प्रमुख नवराज अधिकारीले स्थानीय तहहरूबीच आपसी प्रतिस्पर्धा, समन्वय र सहकार्यलाई प्रवद्र्धन गर्ने उद्देश्यले उत्कृष्ट पालिका छनोट गरिएको बताउनुभयो । उहाँले असल अभ्यासको आदान–प्रदानले सुशासन, सेवा प्रवाह र विकासलाई थप प्रभावकारी बनाउने विश्वास व्यक्त गर्नुभयो ।

सो अवसरमा प्रस्तुत अभ्यास, उपलब्धि तथा मूल्याङ्कनका आधारमा उत्कृष्ट गाउँपालिकाको रूपमा बेनीघाट रोराङ गाउँपालिका र उत्कृष्ट नगरपालिकाको रूपमा नीलकण्ठ नगरपालिका छनोट गरिएको जनाइएको छ । उत्कृष्ट घोषित पालिकाहरूले योजना कार्यान्वयन, सेवा प्रवाह, नवप्रवर्तन र स्थानीय विकासमा उल्लेखनीय प्रगति गरेको मूल्याङ्कन समितिको निष्कर्ष रहेको थियो ।

कार्यक्रममा जिल्ला स्थित सरकारी कार्यालयका प्रमुख, सरोकारवाला निकाय, सञ्चारकर्मी तथा विभिन्न संघ–संस्थाका प्रतिनिधिहरूको उपस्थिति रहेको थियो । सहभागीहरूले यस्ता कार्यक्रमले स्थानीय तहहरूलाई एक–अर्काबाट सिक्ने अवसर प्रदान गर्नुका साथै विकासका असल अभ्यासलाई संस्थागत गर्न मद्दत पुग्ने बताएका छन् ।