धादिङको बेल्खुमा दुई मोटरसाइकल ठोक्किँदा तीनजना घाइते, एकजनाको अवस्था गम्भीर

धादिङ, ८ असार । धादिङ जिल्लाको गजुरी गाउँपालिका–६ बेल्खुस्थित पृथ्वी लोकमार्गमा दुई मोटरसाइकल एक आपसमा ठोक्किँदा तीनजना घाइते भएका छन्।

आज दिउँसो १:१५ बजे काठमाडौँबाट चितवनतर्फ गइरहेको बा ७० प ३२९७ नम्बरको मोटरसाइकल र विपरीत दिशाबाट आउँदै गरेको बा.प्र.०२–०३७ प ७६९२ नम्बरको मोटरसाइकल एकआपसमा ठोक्किँदा उक्त दुर्घटना भएको हो।

दुर्घटनामा तनहुँको बसन्तपुर–३ का ५७ वर्षीय रामचन्द्र राना भाट गम्भीर घाइते भएका छन्। उहाँका दुबै खुट्टामा गम्भीर चोट लागेकोले थप उपचारका लागि  ट्रमा सेन्टर काठमाडौँ रिफर गरिएको प्रहरीले जनाएको छ।

त्यस्तै, नुवाकोटको ककनी गाउँपालिका–१ निवासी २५ वर्षीय अमित कुमार बलामीको बायाँ हातमा चोट लागेको छ भने उनको अवस्था सामान्य रहेको छ।

७६९२ नम्बरको मोटरसाइकलमा पछाडि सवार शिबपुरी निवासी ३५ वर्षीया राममाया तामाङको बायाँ खुट्टा र दायाँ हातमा सामान्य चोट लागेको प्रहरीले जनाएको छ।

घटनास्थलमा अस्थायी प्रहरी पोष्ट आदमघाटबाट प्रहरी निरीक्षक चित्र बहादुर खत्रीको नेतृत्वमा र इलाका प्रहरी कार्यालय गजुरीबाट प्रहरी नायब उपरीक्षक विकास थापाको कमाण्डमा टोली खटिएको थियो। दुर्घटनाबारे थप अनुसन्धान भइरहेको प्रहरीले जनाएको छ।