धादिङमा बेरुजु नियन्त्रणमा नीलकण्ठ नगरपालिकाको अग्रता, बेनिघाट रोराङ दोस्रो स्थानमा

धादिङबेशी, २ जेठ। महालेखापरिक्षकको ६२ औ बार्षिक प्रतिवेदन अनुसार धादिङको स्थानिय तहमा बेरुजु कम गर्नेमा नीलकण्ठ नगरपालिका पहिलो स्थानिय तह भएको छ ।

आर्थिक वर्ष २०८०/०८१ को तथ्यांक अनुसार नीलकण्ठ नगरपालिकाले जम्मा ०.१२ प्रतिशत बेरुजु मात्र कायम राखेर जिल्लामा पहिलो मात्र नभई, बागमती प्रदेशमा दोस्रो, देशभरका नगरपालिकामध्ये तेस्रो र देशका ७५३ स्थानीय तहहरूमध्ये आठौँ स्थानमा पर्न सफल भएको हो ।

धादिङका १३ वटा स्थानिय तह मध्ये बेरुजु कमी गराई बेनिघाट रोराङ गाउँपालिका दोस्रो हुन सफल भएको छ । बेनिघाट रोराङ गाउँपालिकाले जम्मा ०.४५ प्रतिशत मात्रै बेरुजु कायम गरि धादिङमा दोस्रो भएको हो । त्यसैगरी धुनिबेशी नगरपालिकाले १.४८ प्रतिशत कायम गरि तेस्रो भएको छ । धादिङको सिद्धलेक गाउँपालिकाले १.५१ मात्रै बेरुजु कायम गरि जिल्लामा चौथो हुन सफल भएको छ ।

महालेखापरिक्षकको ६२ औ बार्षिक प्रतिवेदन अनुसार १.६२ प्रतिशत बेरुजु कायम गरि धादिङमा गल्छी गाउँपालिका पाचौ स्थानमा पर्न सफल भएको छ । त्यसैगरी नेत्रावती डवजोङ गाउँपालिका धादिङमा बेरुजु कम गर्ने स्थानिय तहमा छैटौंमा परेको छ । १.७८ प्रतिशत मात्रै बेरुजु कायम गरि ज्लालामुखी गाउँपालिका सातौमा परेको छ ।

धादिङको गजुरी गाउँपालिकाको आ.व. २०८०/०८१ मा २ं.४३ प्रतिशत बेरुजु रहेको छ । रुवी भ्याली गाउँपालिकाको २.६० प्रतिशत बेरुजु देखिएको प्रतिवेदनमा उल्लेख छ । त्रिपुरासुन्दरी गाउँपालिकाको ३.४१ प्रतिशत बेरुजु छ भने खनियाबास गाउँपालिकाको ३.६१ प्रतिशत बेरुजु देखिएको छ ।

त्यसैगरीे थाक्रे गाउँपालिकाको ४ प्रतिशत र गंगाजमुना गाउँपालिकाको ५.५४ प्रतिशत बेरुजु रहेको हालसालै महालेखापरिक्षकको कार्यालयले सार्वजनिक गरेको प्रतिवेदनमा उल्लेख छ ।