ज्वालामुखीमा सम्पन्न बृहत स्वास्थ्य शिविरबाट १ हजार ४० जना लाभान्वित

धादिङ,२० बैशाख
धादिङको ज्वालामुखी गाउँपालिका वडा नम्बर २ मैदीस्थित साधारण तथा संस्कृत माध्यमिक विद्यालयमा बृहत निःशुल्क बिशेषज्ञ स्वास्थ्य शिविर सम्पन्न भएको छ । ज्वालामुखी गाउँपालिकाको आयोजना तथा रोटरी क्लब अफ नारायणी मिडटाउन र रोटर्याक्ट क्लब अफ नारायणी मिडटाउनको सह–आयोजनामा शिविर सम्पन्न भएको हो । मौलाकालिका अस्पताल प्रा.लि., भरतपुर चितवन र धादिङ जिल्ला अस्पतालले प्राविधिक सहयोग प्रदान गरेका थियो ।

शिविरबाट एक हजार ४० जना बिरामी लाभान्वित भएका छन् ।बिशेषज्ञ शिविरबाट १९ जनाको जनरल सर्जरी,२३१ ज्नाले जनरल फिजिशियन सेवा,१२८ जनाले महिला रोग सेवा,४० जनाले बालरोग सेवा,३७३ जनाले हाडजोर्नी सेवा,१९ जनाले दन्तरोग सेवा र १४० जनाले छाला रोग सेवा लिएका छन् ।गाउँपालिकाका अध्यक्ष यामनाथ दनैको अध्यक्षतामा भएको शिविर कार्यक्रममा रोटरी क्लब अफ नारायणी मिडटाउनका पूर्व अध्यक्ष तथा बरिष्ठ स्त्रीरोग विशेषज्ञ डा. केशबराज भुर्तेलको प्रमुख आतिथ्य तथा गाउँपालिकाका उपाध्यक्ष धर्म बहादुर अर्यालको विषेश आतिथ्यता रहेको थियो ।

शिविर उद्घाटन सत्रमा वडाका अध्यक्षहरु, स्वास्थ्यकर्मी तथा स्थानीय नागरीकहरुको उल्लेखनीय उपस्थिति रहेको थियो । कार्यक्रमलाई सम्बोधन गर्नुहुँदै अध्यक्ष दनैले निर्वाचित भएको तीन वर्षको अवधिमा प्रत्येक नागरिकको घरघरमा सुरक्षित, स्वच्छ खानेपानी तथा आधारभूत स्वास्थ्य सेवा पु¥याउने काम गरिरहेका बताउनुभयो । उहाँले भन्नुभयो, बाँकी दुई वर्षमा पनि नागरिकका पीर–मर्का बुझेर सेवा–सुविधा प्रदान गर्ने प्रतिबद्धता जनाउनुभएको छ ।

त्यस्तै उपाध्यक्ष धर्म बहादुर अर्यालले घर–घरमा सिंहदरबार, हरेक घरमा स्थानीय सरकार भन्ने मर्म अनुरूप जनतालाई सेवा दिने उद्देश्यले यो शिविर सञ्चालन गरिएको बताउनुभयो ।प्रमुख अतिथि डा. भुर्तेलले सामान्यतया महिलाहरुमा तल्लोपेट दुख्ने, सेतोपानि बग्ने समस्याहरु देखापरेको जानकारी दिनुभयो । उहाँले भन्नुभयो , “यदि धादिङमा पाठेघर खस्ने रोगको उपचार सम्भव नभएमा हामी धादिङ अस्पतालसँग सहकार्य गरेर यसको निःशुल्क उपचार गर्ने बताउनुभयो । शिविरमा महिलासहित विभिन्न उमेर समूहका नागरिकहरूले सेवा लिएका छन् । शिविरमा स्वास्थ्य परिक्षण, परामर्श, औषधि वितरण लगायतका सेवा प्रदान गरिएको थियो। गाउँमै विशेषज्ञ सेवा सँगै औषधी प्राप्त गरेपछि नागरिकहरु खुसि भएका छन् ।