सिद्धलेकमा बृहत निशुल्क स्वास्थ्य शिविर सम्पन्न,४ सय जना नागरिक लाभान्वित

धादिङ,१० फागुन
धादिङको सिद्धलेक गाउँपालिका वडा नम्बर ५ स्थित बाग्बच्छला माध्यमिक विद्यालयमा बृहत निशुल्क स्वास्थ्य शिविर सम्पन्न भएको छ ।सिद्धलेक गाउँपालिकाको आयोजना तथा लायन्स क्लव अफ काठमाण्डौ भृकुटीको सहकार्य र मलेखु टिचिङ अस्पताल धादिङको प्राविधिक सहयोगमा निशुल्क स्वास्थ्य शिविर सम्पन्न भएको हो।

बाग्बच्छला मा.वि को प्राङगणमा सम्पन्न भएको विशेषज्ञ सेवामा सुगर, प्रेसर, थाईराईड, कोलेस्ट्रोल,मुटु रोग, पेट रोग, स्त्री रोग , भि.आई.ए. जाँच, आङ खस्ने रोग, जनरल स्वास्थ्थ परिक्षण, भिडियो एक्से , ई.सि.जि सहितको निशुल्क स्वास्थ्थ परिक्षण सम्पन्न भएको गाउँपालिकाको अध्यक्ष परशुराम खतिवडाले जानकारी दिनुभयो ।शिविरबाट ४ सय जना विरामीलाई निशुल्क स्वास्थ्य परिक्षण गरिनुको साथै निशुल्क औषधी वितरण गरिएको थियो ।

सिद्धलेक गाउँपालिकाका अध्यक्ष परशुराम खतिवडाको अध्यक्षतामा भएको शिविर उद्घाटन कार्यक्रममा लायन्स इन्टरनेशनल ३२५ आईका डिष्ट्रिक गर्भनर विनोद ढुंगानाको प्रमुख आतिथ्य रहेको थियो ।निःशुल्क स्वास्थ्य शिविर उद्घाटन समारोहलाई सम्बोधन गर्नुहुदै अध्यक्ष खतिवडाले नागरिकहरुलाई घर आँगनमै स्वास्थ्य सेवा प्रवाह गर्ने उदेश्यले शिविर सन्चालन गरीएको बताउनुभयो ।

सिद्धलेक गाउँपालिकाको विकासको लागि आफु प्रतिबद्ध भएर लागिरहेको बताउनुभयो । संघ र प्रदेश सँग समन्वय गरेर बजेट ल्याएर भएपनि गाउँपालिकाको विकासमा आफु लागिरहेको भन्दै उहाँले सहयोग गर्नको लागि पनि नागरिकहरुलाई आग्रह गर्नुभयो । गाउँमै बिशेषज्ञ सेवा पाएपछि सिद्धलेक गाउँपालिकाका नागरिकहरु खुसि भएका छन् ।