एमालेसँगको गठबन्धन अवसर र चुनौती दुवै हो : पर्यटन मन्त्री पाण्डे

धादिङ, ०५ माघ ।

संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले मुख्य प्रतिपक्षी पार्टी नेकपा एमालेसँगको गठबन्धनले अवसर र चुनौती दुवै प्रदान गर्ने बताउनुभएको छ । शनिबार राष्ट्रिय लोकतान्त्रिक अपाङ्ग संघ धादिङको दोस्रो जिल्ला अधिवेशन उद्घाटन समारोहमा मन्त्री पाण्डेले एमालेसँग सहकार्य र प्रतिस्पर्धा दुवै हुने बताउनुभएको हो ।

उहाँले भन्नुभयो, “एमालेसँग सहकार्य र प्रतिस्पर्धा दुबै हुन्छ । २०८४ सम्म यो गठबन्धन गरेर लैजान सहकार्य हुनेछ। सुशासन, भ्रष्टाचार न्यूनिकरण र सरकारलाई स्थायित्व दिन गठबन्धन आवश्यक छ।“ “तर, २०८४ को निर्वाचनमा प्रतिस्पर्धा अनिवार्य हुनेछ। वडादेखि प्रधानमन्त्रीसम्म कसले राम्रो काम गरेछ भनेर प्रतिस्पर्धा हुनेछ। त्यसैले स्वस्थ प्रतिस्पर्धा हुनेछ। त्यसकारण पार्टीलाई सुदृढीकरण, बलियो र मजबुत बनाएर अघि बढाउनु पर्छ,“ उहाँले थप्नुभयो ।

मन्त्री पाण्डेले सरकार संस्कृति, पर्यटन र नागरिक उड्डयन क्षेत्रलाई सक्रिय बनाउने दिशामा काम गर्दै रहेको जानकारी दिनुभयो । उहाँले भन्नुभयो, “नेपाल विविधतापूर्ण संस्कृति र प्रकृतिको देश हो, र नेपालका पर्यटनको प्रचार प्रसारलाई तीव्र बनाउन आवश्यक छ। नेपालको पर्यटन क्षेत्रमा ठूलो लगानीसँगै लाखौं पर्यटकहरू भित्र्याउने अवसर छ।“

“हामी पर्यटन, संस्कृति र नागरिक उड्डयन क्षेत्रलाई गतिशील बनाउन तत्पर छौं। प्रधानमन्त्री, अर्थमन्त्री, कानूनमन्त्रीसहित पर्यटनसँग सम्बन्धित मन्त्रालयहरूका साथ समन्वय गरेर १० वर्षे कार्ययोजना तयार गरिएको छ, जसबाट नेपालको पर्यटन क्षेत्रमार्फत नेपालको अर्थतन्त्रमा योगदान पु¥याउने कार्य भइरहेको छ।“
अन्त्यमा, उहाँले आफ्नो निष्ठा र इमानदार राजनीतिका साथ देश र पर्यटन मन्त्रालयको सेवामा लागिरहेको कुरा उल्लेख गर्दै, कुनैपनि किसिमको कलंकबाट मुक्त रहन प्रतिबद्धता व्यक्त गर्नुभयो ।

तस्विर : नेपालपथ