सिद्धलेक गाउँपालिकाको राष्ट्रपति रनिङ शिल्ड महाकाली माविले जित्यो

धादिङ,०१ पौष ।
सिद्धलेक गाउँपालिकाको तेस्रो पालिका–स्तरीय राष्ट्रपति रनिङ शिल्ड प्रतियोगिता महाकाली माविले जितेको छ। आइतबार सम्पन्न प्रतियोगितामा सिद्धलेक–७ पिपलटारस्थित महाकाली माध्यमिक विद्यालयले ८ स्वर्ण पदक जित्दै उपाधि हात पारेको हो।

प्रतियोगितामा १ निजी र १३ सरकारी विद्यालयसहित १४ वटा माध्यमिक विद्यालयको सहभागिता रहेको थियो। छात्र र छात्राको भलिबल, कबड्डी, र एथ्लेटिक्सका विभिन्न विधामा प्रतिस्पर्धा गराइएको थियो।

खिर्रेको नलाङ पात्ले माध्यमिक विद्यालयको संयोजनमा आयोजित प्रतियोगितामा महाकाली माविले ८ स्वर्ण, २ रजत र ३ कास्य पदक जित्दै प्रथम स्थान हासिल ग¥यो। त्यस्तै, ४ स्वर्ण, १ रजत र ५ कास्य पदकसहित नलाङ पात्ले मावि द्वितीय भयो।  ३ स्वर्ण र २ रजतसहित सुन्दरी मावि तेस्रो भएको छ । चौथो भएको सत्यवती माविले ३ स्वर्ण र १ रजत र ४ कास्य पदक जितेको छ ।

प्रतियोगितामा बिजयी विद्यार्थी तथा विद्यालयहरुलाई नेपाल सरकारका कृषि तथा पशुपन्छी विकास मन्त्री रामनाथ अधिकारी, सिद्धलेक गाउँपालिकाका अध्यक्ष परशुराम खतिवडा,उपाध्यक्ष सबिता अर्यालले शिल्ड,प्रमाणपत्र र मेडलद्धारा पुरस्कृत गर्नुभएको थियो।

गाउँपालिकाका अध्यक्ष खतिवडाको अध्यक्षता तथा कृषि तथा पशुपन्छी विकास मन्त्री अधिकारीको प्रमुख आतिथ्यता भएको समापन समारोहमा गाउँपालिका उपाध्यक्ष अर्याल,प्रमुख जिल्ला अधिकारी सुमन घिमिरे, वडा नं २ का वडाध्यक्ष शम्भु गुरुङ (सागर), वडा नम्बर ३ का वडाध्यक्ष देव बहादुर पुलामी, कार्यपालिका सदस्य, वडासदस्यहरु, विभिन्न राजनीतिक दलका प्रतिनिधि लगाएतको उपस्थिती रहेको थियो ।

गाउँपालिकाले विद्यार्थी र शिक्षकहरूको थकान तथा सरसफाइलाई ध्यानमा राख्दै सोमबारका लागि विद्यालयमा बिदा दिएको छ।