डिभिजन वन कार्यालय धादिङको जिल्ला वन क्षेत्र समन्वय समिति बैठक सम्पन्न

धादिङ,१४ असोज ।

डिभिजन वन कार्यालय धादिङको जिल्ला वन क्षेत्र समन्वय समिति र सरोकारवालाहरूको सहभागितामा डिभिजन स्तरीय समन्वय बैठक सम्पन्न भएको छ। बैठकमा डिभिजनल वन अधिकृत विष्णु प्रसाद आचार्यले प्रमुख एजेन्डाहरू प्रस्तुत गर्नुभएको थियो।

बैठकमा आचार्यले अघिल्लो आर्थिक वर्षमा सम्पन्न भएका कार्यक्रमहरूको प्रगति विवरण प्रस्तुत गर्दै, आगामी आर्थिक वर्षका लागि योजना बनाइएका कार्यक्रमहरूको बारेमा जानकारी दिनुभयो। प्रमुख कार्यक्रमहरूमा समूहको कार्ययोजना नवीकरण, बिरुवा उत्पादन र वितरण समावेश थिए। सरकारी नर्सरीबाट वन प्रजातिका बिरुवा तथा जडिबुटीहरू, जस्तै टिम्बुर, पिकानत, र बाँसको उल्लेखनीय मात्रामा वितरण गरिएको जानकारी दिनुभयो।

डिभिजनल वन अधिकृत आचार्यका अनुसार, गत वर्ष कबुलियती वनका १५० समूह, सामुदायिक वनका ६८ समूह, र ३ धार्मिक वनहरू हस्तान्तरण गरिएको छ। साथै, थाक्रे गाउँपालिका वडा नं २ मा रहेको प्रेम सागर फाउन्डेसनमा नर्सरी निर्माण र बिरुवा उत्पादनको काम पनि सम्पन्न गरिएको छ। अन्य प्रमुख कार्यक्रमहरूमा चिउरी, चमेरो चेपाङ अभियान, वर पिपल समी पुनर्स्थापना तथा उद्धार कार्यक्रम, सालक संरक्षण अभियान, र जनतासँग वनका कुरा जस्ता गतिविधिहरू समावेश गरिएको जानकारी दिनुभयो ।

आगामी आर्थिक वर्षको लागि २ करोड ९० लाख ८३ हजार रुपैयाँको बजेटमा समूह नवीकरण, गणेश हिमाल प्रवर्द्धन कार्यक्रम, र वृक्षारोपणजस्ता मुख्य योजनाहरू समावेश गरिएको आचार्यले बताउनुभयो।

डिभिजन वन कार्यालयले वर, पिपल, समी संरक्षण शिक्षा, नक्षत्र बाटिका निर्माण, चिउरी चमेरो संरक्षण, र जनतासँग वनका कुरा कार्यक्रमलाई विशेष अभियानका रूपमा सञ्चालन गर्ने निर्णय गरेको छ।

बैठक समन्वय समितका प्रमुख नवराज अधिकारीको अध्यक्षतामा सम्पन्न भएको थियो, जसमा समन्वय उपप्रमुख कुलमान वि.क, प्रमुख जिल्ला अधिकारी राजेन्द्र देव पाण्डे, पत्रकार महासंघका अध्यक्ष राजाराम शर्मा लगायतको उपस्थिति रहेको थियो।