नीलकण्ठ नगरपालिकाद्धारा बजार अनुगमनलाई तीव्रता दिँदै उपभोक्ताको हित संरक्षणमा कडाइ गर्ने निर्णय

धादिङ,११ असोज ।
नीलकण्ठ नगरपालिकाले उपभोक्ता हित संरक्षणमा थप कडाइ गर्दै बजार अनुगमनलाई नियमित गर्ने निर्णय गरेको छ। उपप्रमुख तथा उपभोक्ता हित संरक्षण समितिका संयोजक दिपक विश्वकर्माको अध्यक्षतामा बसेको समितिको बैठकले बजारमा व्याप्त अनियमितता रोक्न र उपभोक्ताको अधिकार संरक्षण गर्न विभिन्न कदमहरू उठाउने निर्णय गरेको हो।

बैठकमा नगर क्षेत्रका सबै व्यवसायीलाई व्यवसाय दर्ता गरी सम्बन्धित कार्यालयबाट आवश्यक इजाजत पत्र लिएर मात्र व्यापार सञ्चालन गर्न सूचित गरिने भएको छ।
दर्ता नभएका व्यवसायहरूले दर्ता नभएसम्म व्यवसाय सञ्चालन गर्न नपाउने प्रावधान कडाइका साथ लागू गरिने  उपप्रमुख तथा उपभोक्ता हित संरक्षण समितिका संयोजक विश्वकर्माले बताउनुभयो ।

बिश्वकर्माका अनुसार अनुगमन टोलीले असोज १३ गतेदेखि नगरका विभिन्न स्थानमा बजार अनुगमन गर्ने तयारी गरेको छ, जसका लागि वडा स्तरमा पनि अनुगमन समिति गठन गरिनेछ।

समितिले व्यवसायीहरूलाई पसलमा देखिने गरी मूल्यसूची राख्न निर्देशन, अङ्कित मूल्यभन्दा बढीमा सामान बिक्री गर्न नपाइने, साथै उपभोग्य वस्तुको गुणस्तर र स्वच्छता कायम गर्न आवश्यक व्यवस्था गर्न व्यवसायीहरूलाई आग्रह गरिएको छ।

यस्तै, मदिरा ऐन २०३१ अनुसार प्लास्टिक पाउचमा मदिरा उत्पादन र बिक्रीमा रोक लगाउन पनि कडाइ गरिने र प्लास्टिक पाउचमा बिक्री गरिने मदिराले जनस्वास्थ्यमा गम्भीर असर पार्ने भएकाले यसलाई निरुत्साहित गर्न सम्बन्धित निकायहरूलाई पत्राचार गरिनेछ।

धादिङबेंसीबाट छुट्ने सवारी साधनहरूको आरक्षण सिट, भाडादर छुट, र यात्रुहरूको संख्या व्यवस्थापनका लागि पनि कडा नियम लागू गरिने निर्णय गरिएको बिश्वकर्माले बताउनुभयो । यसलाई कार्यान्वयन गर्न जिल्ला प्रशासन, प्रहरी, र ट्राफिक कार्यालयलाई आवश्यक निर्देशन पठाइने उहाँको भनाइ छ ।

यी निर्णयहरू उपभोक्ताको अधिकार संरक्षण र बजारमा अनुशासन कायम गर्न महत्वपूर्ण हुने विश्वास गरिएको उपभोक्ता हित संरक्षण समितिले जनाएको छ ।

नीलकण्ठ नगरपालिकाका उपप्रमुख तथा उपभोक्ता हित संरक्षण समितिका संयोजक दिपक विश्वकर्माको अध्यक्षतामा बसेको बैठकमा प्रमुख प्रशासकिय अधिकृत पुरुषोत्तम सुवेदी, घरेलु उद्योग तथा वाणिज्य कार्यलयका प्रमुख मेघनाथ गौतम लगायत प्रशासन कार्यलय, प्रहरी कार्यलय, पत्रकार महासंघ, उपभोक्ता हित संरक्षण मन्चका प्रतिनिधिहरुको उपस्थिति रहेको थियो ।