कृषि क्षेत्रमा फड्को मार्ने गरी काम गर्ने र विषादी नियन्त्रणमा जोड दिने मन्त्री अधिकारीको प्रतिवद्धता

धादिङबेशी । कृषि क्षेत्रमा फड्को मार्ने गरी काम गर्ने नवनियुक्त कृषि तथा पशुपंक्षी विकास मन्त्री रामनाथ अधिकारीले बताउनुभएको छ । मन्त्री अधिकारीले कृषि पेशासँग आवद्ध रहेका किसानहरुलाई राहत दिलाउन क्रियाशिल रहने बताउनुभयो । शुक्रबार नेपाल प्रेस युनियन धादिङले आयोजना गरेको पत्रकार सम्मेलनमा कार्यक्रम उहाँले सो कुरा बताउनुभएको हो । मन्त्री अधिकारीले जनता प्रति उत्तरदायी भएर काम गर्ने समेत बताउनुभएको छ । उहाँले विषादी नियन्त्रणमा जोड दिईने प्रतिवद्धता समेत गर्नुभएको छ ।

कृषि तथा पशुपंक्षी विकास मन्त्री अधिकारीले कृषि उत्पादन र उत्पादकत्व बढाउन, व्यसायिक र प्रतिस्पर्धात्मक कृषि प्रणलीको विकास, गुणस्तरिय बिउ विजन, विषादीको असर न्युनिकरण, कृषि तथा पशु विमा कार्यक्रम, कृषिलाई सम्मानजनक र आकर्षक पेशाको रुपमा विकास कसरी गर्न सकिन्छ भन्ने लगायतका विषयहरुमा ध्यान केन्द्रित भएको भन्दै अध्ययन गरेर अघि बढ्ने बताउनु भयो ।

किसानले सहजै मल पाउने वातावरण नबने सम्म कृषिमा विकास नहुने भन्दै मन्त्री अधिकारीले त्यसमा आफु लागीरहेको बताउनु भयो । किसानले सहजै मल विउ पाउने वातावरण बनाउन आफुले अध्ययन गरेर काम गरिरहेकोले चाडैनै रिजल्ट आउने समेत बताउनुभयो ।

कार्यक्रमकै अवसरमा नवनियुक्त कृषि तथा पशुपक्षी विकास मन्त्री रामनाथ अधिकारीलाई प्रेस यूनियन धादिङले सम्मान गरेको छ । त्यसैगरी शुक्रबार नेपाल घरेलु तथा साना उद्योग महासंघ, नेपाल रेडक्रस सोसाईटी, धादिङ उद्योग वाणिज्य संघ, नेपाल पत्रकार महासंघ, गैर सरकारी संस्था महासंघ धादिङ लगाएत संघ, संस्थाले नवनियुक्त कृषि तथा पशुपंक्षी विकास मन्त्री रामनाथ अधिकारीलाई बधाई तथा सम्मान गरेको थियो ।