गङ्गाजमुना गाउपालिकाको भैंसे, आरूबोट, भंगेरी र मंसेरी गाउँ नमुना, सफा तथा स्वच्छ गाउँ घोषणा

धादिङबेशी । गङ्गाजमुना गाउँपालिका वडा नं. ६ स्थित भैंसे, आरूबोटे, भंगेरी र मंसिरे टोललाई नमुना, सफा तथा स्वच्छ गाउँ घोषणा गरिएको छ । गङ्गाजमुना गाउँपालिका अध्यक्ष भक्त बहादुर लामाको प्रमुख आतिथ्यमा कार्यक्रम सम्पन्न भएको हो । गङ्गाजमुना गाउँपालिकाले बजेट विनियोजन गरी शान्ति नेपालको प्राविधिक सहयोगमा सात वटै वडामा उक्त कार्यक्रमहरू कार्यान्वयनको क्रममा रहेको छ ।

कार्यक्रममा झण्डै ३०० जनाको सहभागी भई विभिन्न पम्पलेट, ब्यानर सहित र्याली गरेर कार्यक्रम स्थलसम्म पुगेको थियो भने आफ्नो टोलको हरेक घर सरसफाई सहित सिंगारिएको थियो । चार वटै टोलको स्थलगत अनुगमन गरी नमुना स्वस्थ समुदाय प्राप्तिका आधारहरू क्षेत्रगत सूचकहरू १५ वटा प्राप्ति भए पश्चात आगामी दिनहरूमा समेत सो कार्यलाई निरन्तरता दिने प्रतिबद्धता गराई चार वटै टोललाई घोषणापत्र तथा बोर्ड वितरण गरिएको थियो भने सबैभन्दा उत्कृष्ट सरसफाइ भएका घरलाई पुरस्कृत समेत गरिएको थियो । कार्यक्रममा विभिन्न आमा समूह तथा साना नानीहरूले सांगितिक नाच सहित कार्यक्रमलाई थप रौनक प्रदान गरेको थियो । कार्यक्रममा स्थानीय रैथाने बालीको विभिन्न परिकारहरू समेत बनाएको थियो ।

कार्यक्रमको प्रमुख अतिथि भक्त बहादुर लामाले सबै टोलबासीलाई बधाई दिंदै यसरीनै स्थानीय जागरूक भई उठेमा हरेक वर्ष बजेट विनियोजन गरी आ.व.२०८२/०८३ सम्ममा सिंगो गाउँपालिकालाई नै नमुना, सफा तथा स्वच्छ पालिका घोषणा गर्ने योजना बनाएकोले यस घोषणा कार्यक्रम मात्र नभई यसलाई निरन्तरता दिन अनुरोध गर्नुभयो ।

कार्यक्रमको विशेष अतिथि गाउँपालिकाका प्रमुख प्रशासकीय अधिकृत अनिल श्रेष्ठले चारवटै टोललाई बधाई दिंदै यस कार्यलाई निरन्तरता दिन सके मात्र यस कार्यक्रमको औचित्य हुने र उक्त सरसफाई कार्यक्रमले व्यक्तिगत र समुदायको समग्र स्वास्थ्य अवस्था समेत सुधार गर्न सघाउ पुर्याउने हुनाले रैथाने बालीको परिकार बनाई स्थानीय कला, संस्कृतिको संरक्षण र प्रबर्द्धन गर्दै पर्यटन विकासको लागि समेत महत्वपूर्ण हुने कुरा बताउनु भयो ।

कार्यक्रमको अध्यक्ष कार्यबाहक वडा अध्यक्ष धन बहादुर गुरूङले खुसी व्यक्त गर्दै यस कार्यलाई निरन्तरताको लागि आग्रह गर्नुभयो । उहाँले कार्यक्रममा उपस्थिति भएका टोलबासीहरूले गाउँपालिकालाई धन्यवाद दिंदै यस्तो कार्यक्रमले सभ्य भई अगाडी बढ्न मद्दत गरेकोले आगामी दिनहरूमा समेत यस कार्यलाई निरन्तरता दिने प्रतिबद्धता व्यक्त गर्नुभयो ।

कार्यक्रमका केहि तस्विरहरु