कुमारी बैँक धादिङद्धारा दुर्घटनामा ज्यान गुमाएका परिवारलाई रकम हस्तान्तरण

धादिङबेशी । कुमारी बैँक लिमिटेड धादिङबेशीले दुर्घटनामा परी निधन भएका ग्राहकका परिवारलाई मृत्यु दावी भुक्तानी बापत २ लाख प्रदान गरेको छ । गत असोज १७ गते सवारी साधनको ठक्करबाट ज्यान गुमाएका सिद्धलेक गाउँपालिका वडा नं ६ निवासी निर्मल श्रेष्ठको परिवारलाई बैँकको धादिङबेशी शाखाले रु २ लाख हस्तान्तरण गरेको हो ।

बिहीबार एक कार्यक्रमका बीच बैँकका शाखा प्रबन्धक धन बहादुर श्रेष्ठले मृतकका बुबा नेत्रलाल श्रेष्ठलाई २ लाखको चेक हस्तान्तरण गर्नुभएको हो । परिवार सुरक्षा वचत खाता मार्फत गरिएको उक्त बीमाले श्रेष्ठको परिवारलाई राहत मिलेको छ ।

“परिवार सुरक्षा वचत खाता” खोलेमा खातामा रु २६ लाख सम्मको परिवारको बिमा हुने बंैकले जानकारी दिएको छ । जसमा दम्पतिको आकस्मिक दुर्घटना बिमा, पूर्ण शारिरीक अशक्तता बिमा, परिवारको सदस्यका लागि १८ घातक रोगहरुका लागि बिमा, परिवारको औषधोपचारको बिमा सुविधा पनि उपलब्ध गरेको छ । बैँकले यस अघि २०७९ साल जेठ ३१ गते धुनीवेशी नगरपालिका वडा नं ९ स्थित सुरुङमार्ग नजिकै मोटरसाईकल दर्घटनामा परी ज्यान गुमाएका नीलकण्ठ नगरपालिका वडा नम्बर १२ निवासी यम बहादुर मगरको परिवारलाई १० लाख हस्तान्तरण गरेको थियो ।

त्यसैगरी वि.स. २०८० साल असार १७ गते करेन्ट लागेर मृत्यु भएका नीलकण्ठ नगरपालिका वडा नम्बर ८ का डम्बर बहादुर लामिछाने परिवारलाई मृत्यु दावी भुक्तानी स्वरुप १० लाख हस्तान्तरण गरेको थियो ।