गंगाजमुनामा जनप्रतिनिधि तथा सामाजिक शिक्षकहरूलाई सामाजिक अपराध तथा समसामयिक अपराधहरूको विषयमा प्रशिक्षण

धादिङबेशी । गंगाजमुना गाउँपालिकाका जनप्रतिनिधि तथा सामाजिक शिक्षकहरूलाई सामाजिक अपराध तथा समसामयिक अपराधहरूको विषयमा प्रशिक्षण गरिएको छ । प्रहरी शिक्षक कार्यक्रम गङ्गाजमुना गाउँपालिकाको आयोजना तथा जिल्ला प्रहरी कार्यालय धादिङको सहकार्यमा “समुदाय प्रहरी साझेदारी कार्यक्रम “ अन्तर्गत सम्पन्न गरिएको हो ।

कार्यक्रमको प्रमुख अतिथि तथा प्रशिक्षक जिल्ला प्रहरी कार्यालय धादिङका प्रमुख गौतम मिश्रले सामाजिक शिक्षक नै समाजको ईन्जिनियर भएको हुनाले सामाजिक शिक्षकलाई यस कार्यक्रम मार्फत विद्यार्थीमा पुर्याउन नेपाल प्रहरीले नयाँ लञ्च गरेको कार्यक्रम बताउनु भयो ।

कार्यक्रममा गाउँपालिकाका अध्यक्ष भक्त बहादुर लामाले उक्त कार्यक्रमबाट प्राप्त ज्ञानहरू विद्यालयमा पुगेर सबै विद्यार्थीहरू समक्ष साक्षात्कर गर्नुहुन अनुरोध गर्नुभएको छ । त्यसैगरी गाउँपालिका उपाध्यक्ष रामेश्वर सिंखडाले यो कार्यक्रम ऐतिहासिक रहेको बताउँदै यस्ता कार्यक्रमले समाजलाई सुधार गर्न मद्दत गर्ने बताउनुभएको छ ।

समाजलाई सभ्य बनाउन र सामाजिक अपराधबारे सचेत गराउन एवं समाज, विद्यालय, स्थानीय तह र प्रहरी बीचको सम्बन्ध मजबुत बनाई अपराधिक घट्ना न्यूनीकरण गर्नको लागि कार्यक्रम आयोजना गरिएको प्रमुख प्रशासकीय अधिकृत अनिल श्रेष्ठले बताउनु भयो । सहभागी शिक्षकले यस्ता कार्यक्रमले सामाजिक शिक्षकलाई महत्व दिई समाज परिवर्तनको लागि महत्वपूर्ण भूमिका खेल्ने भन्दै कार्यक्रमको लागि गाउँपालिकालाई धन्यवाद दिनुभयो ।

कार्यक्रममा जनप्रतिनिधि, शिक्षक, प्रहरी र कर्मचारीहरू समेत गरी करिब ७० जनाको उपस्थिति रहेको थियो ।