एकल महिला समुह WHR को २९ औ बार्षिक साधारणसभा धादिङबेशीमा, एकल महिलाहरु अझ संगठित भएर लाग्नुपर्ने लिली थापाको भनाई

नीलकण्ठ समाचारदाता । मानव अधिकारको लागी महिला,एकल महिला समुह WHR को २९ औ बार्षिक साधारण सभा सम्पन्न भएको छ ।
संस्थाकाको अध्यक्ष कल्पना अधिकारीको अध्यक्षतामा भएको कार्यक्रममा केन्द्रिय कार्यालयका संस्थापक एवम् राष्ट्रिय मानव अधिकार आयोगका सदस्य माननिय लिली थापाको प्रमुख आतिथ्यतामा साधारण सभा सम्पन्न भएको हो ।

कार्यक्रमलाई सम्बोधन गर्दै प्रमुख अतिथि लिली थापाले एकल महिलाहरु अझ संगठित भएर लाग्नु पर्ने बताउनु भएको छ । एकल महिला सुरक्षा कोष संचालन कार्यविधि संशोधन गर्न नसक्दा थप समस्या भोग्नु परेको उहाँको भनाई छ । उहाँले एकल महिलाहरु अन्याएमा परेको भन्दै एकल महिलाको समस्या समाधानलाई प्राथमिकता दिन सरोकारवालाहरुलाई आग्रह गर्नु भएको छ । उहाँले एकल महिलाको सवाल सरकारको प्राथमिकतामा नपरेको बताउनु भएको छ । एकल महिलाले पाउदै आएको भक्ताको विषयमा ऐन बनाएर कार्यान्वयनमा ल्याउन सरकारसँग माग गर्नु भएको छ ।

उहाँले चुनाव भएको बेला मात्रै एकल महिला खोज्ने प्रविद्धिको अन्त्य हुनुपर्ने भन्दै आरक्षणको ब्यवस्था हुनुपर्ने कुरामा जोड दिनु भएको हो । राज्यबाट पाउने सेवासुविधाबाट पनि एकल महिलालाई बञ्चित गराएको भन्दै अर्थमन्त्रालयले हरेक वर्ष महिला बालबालिका तथा जेष्ठ नागरिक मन्त्रालयलाई रकम उपलब्ध गराउने र मन्त्रालयले कार्यान्वयन नगर्दा आठ करोड रुपैंया प्रयोगमा आउन नसकेको प्रति उहाँले गुनासो गर्नभएको थियो । एकल महिला सुरक्षा कोष संचालनमा ल्याउनुपर्ने, राज्यका हरेक क्षेत्रमा एकल महिलालाई आरक्षणको व्यवस्था हुनुपर्ने र व्यवस्थापिकाको समानुपातिक प्रणालीमा एकल महिलाको प्रतिनिधित्व हुनुपर्ने माग सहित धादिङ घोषणापत्र जारी गर्ने तयारी भैरहेको एकल महिला समुह WHR धादिङका अध्यक्ष कल्पना अधिकारीले बताउनु भयो ।

धादिङबेशीमा भएको साधारणसभा ३५ जिल्लाका ६० जना सदस्यहरुको सहभागिता रहेको छ । कार्यक्रममा पुर्व अध्यक्ष चन्द्रिका भट्टराई, निर्मला ढुङ्गना, केन्द्रिय अध्यक्ष कविता पाडे, बागमती प्रदेश सभा सदस्य एवम् धादिङ संस्थापक अध्यक्ष मायादेवी शर्मा लगाएतको आतिथ्यता रहेको थियो । नेपालमा एकल महिलाहरु ८ लाख भन्दा बढि रहेका छन् ।