जनजागृति माविको २३ औँ बार्षिक उत्सव तथा २४ औँ स्थापना दिवस थाक्रेमा सम्पन्न

धादिङ,१५ भदौ ।
धादिङको थाक्रे गाउँपालिका वडा नम्बर ६ स्थित जनजागृति माध्यमिक विद्यालयको २३ औँ बार्षिक उत्सव शनिवार सम्पन्न भएको छ । सामुदायिक विद्यालय तर्फ थाक्रेमा उत्कृष्ट नतिजा ल्याउन सफल विद्यालयले शुक्रबार विशेष कार्यक्रमको आयोजना गरी बार्षिक उत्सव मनाएको हो ।

विद्यालय व्यवस्थापन समिति अध्यक्ष गोकर्ण रुपाखेतीको अध्यक्षतामा सम्पन्न भएको कार्यक्रममा थाक्रे गाउँपालिकाका अध्यक्ष रामकुमार आचार्यको प्रमुख आतिथ्यता रहेको थियो । गाउँपालिकाका उपाध्यक्ष यन्त्र बहादुर थापा जिन्दगीको विशेष आतिथ्यता रहेको कार्यक्रममा सरोकारवाला निकायका प्रमुख एवंम प्रतिनिधिहरुको आतिथ्यता रहेको थियो ।

कार्यक्रमको अवसरमा विद्यालयका प्रधानाध्यापक लावण प्रसाद फुयालले विद्यालयको बार्षिक प्रगति प्रतिवेदन प्रस्तुत गर्नुभएको थियो । जनजागृति विद्यालय शैक्षिक सत्र वि.सं.२०८० सम्ममा न्युनतम भौतिक, मानवीय तथा आर्थिक श्रोत सम्पन्नता हासिल गरि अत्याधुनिक प्रविधियुक्त शिक्षण पद्धतिको विकास गर्दै रोजगारमूलक, प्राविधिक, व्यवसायिक र गुणस्तरीय शिक्षा प्रदान गर्ने जिल्लाकै उत्कृष्ट नमुना विद्यालयको रुपमा स्थापित हुने बताउनुभयो ।

कार्यक्रमलाई सम्बोधन गर्नुहुदै प्रमुख अतिथी थाक्रे गाउँपालिकाका अध्यक्ष रामकुमार आचार्यले विद्यालयमा विद्यार्थीको शिक्षण सिकाइलाई प्रभावकारी बनाउने गरी काम गर्नुपर्ने बताउनुभयो । साथै जनजागृतिलाइ देशकै नमुना विद्यालय बनाउन पालिकाको भरपुर सहयोग गर्ने प्रतिबद्धता व्यक्त गर्नुभएको थियो । वाषिर्कोत्सवको अवसरमा विद्यार्थीहरुले मार्सल आर्ट अन्तर्गते तेक्वान्दो प्रस्तुति, राष्ट्रिय सेवा दलको तालिम लिएका विद्यार्थीहरुको प्रस्तुति, सांस्कृतिक कार्यक्रम र पुरस्कार वितरण समेत गरीएको थियो ।