हाप्किडो संघ धादिङको अध्यक्षमा किशोर तामाङ चयन

धादिङ,५ साउन
नेपाल हाप्किडो संघ धादिङको जिल्ला भेला सम्पन्न भएको छ । भेलाले किशोर तामाङको अध्यक्षतामा ८ सदस्यीय हाप्किडो संघ धादिङ गठन गरेको हो ।नव गठित कार्य समितिको उपाध्यक्षमा दावा लामा र सुदिप थापा, सचिवमा सन्तोष रेग्मी, कोषाध्यक्षमा मञ्जु तामाङ, सदस्यहरुमा सुनिल तामाङ, सुमन उप्रेती र बलराम मगर चयन भएका छन् ।

हाप्किडो संघ बागमती प्रदेशका अध्यक्ष मनोज लामाको अध्यक्षता र जिल्ला खेलकुद विकास समिति धादिङका अध्यक्ष प्रतापसिंह तामाङको प्रमुख आतिथ्यतामा भएको उक्त भेलामा माओवादी केन्द्र धादिङका सचिव दिपक लामिछाने (सुवोध) को विशेष आतिथ्यता रहेको थियो । धुनीबेसी नगरपालिका वडा नम्बर ६ का वडा अध्यक्ष रमेश आचार्यको विशेष आतिथ्यता रहेको भेलामा सरोकारवाला निकायका प्रमुख एवंम प्रतिनिधिहरुको सहभागिता रहेको थियो । भेलाले राजकुमार पाठकको संयोजकत्वमा ३ सदस्यीय सल्लाहकार समिति समेत गठन गरेको छ ।सदस्यहरु राजकुमार रुपाखेती र विदुर आचार्य छन् ।