धादिङमा नयाँ नागरिकता लिने भन्दा प्रतिलिपी लिनेको संख्या बढी

धादिङ,५ साउन ।
धादिङमा नयाँ नागरिकता लिने भन्दा प्रतिलिपी लिनेको संख्या बढी भएको पाईएको छ । जिल्ला प्रशासन कार्यालय धादिङले आयोजना गरेको आर्थिक बर्ष २०७९/८० को बार्षिक प्रगती सार्वजनिकीकरण कार्यक्रममा प्रमुख जिल्ला अधिकारी बद्रीनाथ गैह्रेले नागरिकताको प्रतिलिपी लिनेको संख्या बढी भएको बताउनुभएको हो ।

गत आर्थिब बर्षमा जिल्ला प्रशासन कार्यलयबाट नयाँ नागरिकता लिनेको संख्या १२,२६५ थियो भने प्रतिलिपी लिनेको संख्या १८,२४८ रहेको छ । जिल्ला प्रशासन कार्यालय धादिङमा राष्ट्रिय परिचयपत्र सेवा दर्ता गर्नेको संख्या हाल सम्म १ लाख ८८ हजार १ सय ८७ रहेको छ । जिल्ला प्रशासन कार्यालय धादिङले राहदानी बाट ८ करोड ३ लाख ३६ हजार सात सय रुपैया राजस्व संकलन गरेको छ ।

गत आर्थिक बर्षमा धादिङमा ४ जना नागरिकले नागरिकताको प्रमाणपत्र त्याग गरेका थिए भने आमाको नाम बाट नागरिकता लिनको संख्या ३ रहेको छ । हाल सम्म १८११ वटा संघ संस्था दर्ता भएकोमा गत आ.व.मा १ सय ४४ वटा संघ संस्थाले नविकरण गरेका छन् । आर्थिक बर्ष २०७९/०८० मा ४९ वटा मुद्धा दर्ता भएकोमा जिल्ला प्रशासन कार्यालय धादिङले ४० वटा मुद्धा फछ्यौट गरेको छ । मिटरब्याजी सम्बन्धी २९ वटा उजुरी आएकोमा ५ वटा मुद्धा फस्यौट गरिएको प्रमुख जिल्ला अधिकारी बद्रीनाथ ग्रैह्रेले बताउनुभयो ।