जिल्ला समन्वय समिति धादिङको पाँचौं जिल्ला सभा सम्पन्न

जिल्ला समन्वय समिति धादिङको पाँचौं जिल्ला सभा सम्पन्न भएको छ । बुधबार धादिङबेशी स्थित जिल्ला समन्वय समिति धादिङको पाँचौ जिल्ला सभा तथा आर्थिक बर्ष २०७७/७८ को बार्षिक समिक्षा कार्यक्रम सम्पन्न भएको हो।सभाले गत आर्थिक वर्ष २०७७/०७८ मा सम्पन्न कार्यक्रमको समीक्षा गरिएको थियो।

सभामा जिल्ला समन्वय समिति धादिङका प्रमुख जगन्नाथ नेपालले समितिको प्रगति प्रतिवेदन प्रस्तुत गर्दै गत आ.व.मा समितिले ४० वटा नीतिगत निर्णयहरु गरेको बताउनुभयो। त्यसैगरी प्रमुख नेपालले संघ, प्रदेश र स्थानीय तहले एक आर्थिक वर्षको अवधिमा जिल्लाभित्र सञ्चालन भएका विकास निर्माण सम्बन्धि कामहरुको अनुगमन गरेको पनि बताउनुभयो ।

आ.व. २०७७/०७८ मा नदिजन्य तथा खानिजन्य पदार्थको अनुगमन गरी अवैध रुपमा हुने उत्खनन्, संकलन तथा ओसार प्रसारलाई नियन्त्रण र निरुत्साहन गर्न प्रयास गरेको पनि प्रमुख नेपालले प्रतिवेदनमा उल्लेख गर्नुभएको छ।सभाले आगामी आर्थिक वर्षमा विगतका कामलाई निरन्तरता दिंदै स्थानीय तहले निर्माण गरेका ऐन, नियम र कानूनहरु सूचना केन्द्र स्थापना गरेर नागरिकलाई जानकारी दिने, ऐतिहासिक, धार्मिक, पर्यटन र कृषि लगायतका विषयवस्तुको जानकारी सहितको धादिङ दर्पण पुस्तक प्रकाशन गर्ने, साहित्य सम्मेलन आयोजना गर्ने, स्थानीय विपद व्यवस्थापनका कार्य योजना बनाउने लगायतका नीति तथा कार्यक्रम पारित गरेको प्रमुख नेपालले बताउनुभयो।

जिल्ला समन्वय समिति धादिङका प्रमुख जगन्नाथ नेपालको अध्यक्षतामा भएको सभामा संघिय साँसद भुमि प्रसाद त्रिपाठीको प्रमुख आतिथ्यता रहेको थियो।सभालाई सम्वोधन संघिय साँसद भुमि प्रसाद त्रिपाठीले देशमा संघियता कार्यान्वयनमा जिल्ला समन्वय समितिले गरेको समन्वय र खेलेको भूमिकाको प्रशंसा गर्नुभयो । समन्वय समितिले कम अधिकार र न्यून श्रोत साधनमा पनि संघ, प्रदेश र स्थानीय तीनै तहमा प्रभावकारी समन्वयको काम गरेको पनि त्रिपाठीले बताउनुभयो।

जिल्लासभालाई प्रदेस सांसदहरु डा. रामकुमार अधिकारी र जगत सिंखडा, धादिङका प्रमुख जिल्ला अधिकारी ज्ञानप्रसाद ढकाल लगायतले सभा सफलताको शुभकामना दिनुभएको थियो। यसैगरी बुधबारबाट जिल्लाभित्रका सरकारी कार्यालय, स्थानीय तहको वार्षिक प्रगति समीक्षा गरिएको छ ।समीक्षा कार्यक्रमको पहिलो दिन बुधबार जिल्लाभित्रका सरकारी कार्यालयले आर्थिक वर्ष २०७७/७८ मा गरेका कामहरुको वार्षिक प्रतिवेदन तथा चालु आर्थिक वर्षको कार्यक्रम सार्वजनिक समेत गरेका थिए ।

वार्षिक प्रतिवदेन प्रस्तुत गर्दै कर्मचारीहरुले धादिङका अधिकांश सरकारी कार्यालयहरुमा कर्मचारी अभाव हुदा लक्षित कार्यक्रम सम्पन्न गर्न समस्या भएको बताएका छन् ।यस्तै कोरोना महामारीका कारण पनि योजनाअनुसारको काम सम्पन्न हुन नसकेको बताएका छन् ।भोलि सबै स्थानीय तह तथा केही गैरसरकारी संघसंस्थाको वार्षिक प्रगति समीक्षा गरिने जनाएको छ।