अन्तराष्ट्रिय धादिङ समाजको आयोजनामा बैरेनीमा भदौ २७ र २८ गते निःशुल्क विशेषज्ञ स्वास्थ्य शिविर हुँदै

धादिङ,२४ भदौ
अन्तराष्ट्रिय धादिङ समाजको आयोजनामा धादिङको गल्छी गाउँपालिका वडा नम्बर ६ बैरेनी स्थित बैरेनी अस्पतालमा दुईदिने निःशुल्क विशेषज्ञ स्वास्थ्य शिविर सञ्चालन हुने भएको छ। बाढी प्रभावित सहित स्थानीय नागरिकहरुलाई विभिन्न रोगका विशेषज्ञ चिकित्सकबाट निःशुल्क स्वास्थ्य सेवा उपलब्ध गराउने उद्देश्यले दुई दिने शिविरको आयोजना गरीएको अन्तराष्ट्रिय धादिङ समाजका अध्यक्ष राजन खकुरमालले जानकारी दिनुभयो ।

अन्तर्राष्ट्रिय धादिङ समाजको आयोजनामा हुन लागेको शिविर भदौ २७(शनिवार) र २८ गते (आईतबार) बैरेनी अस्पतालमा सञ्चालन हुनेछ। शिविरमा सर्वसाधारणले विभिन्न स्वास्थ्य समस्याका लागि विशेषज्ञ चिकित्सकसँग प्रत्यक्ष स्वास्थ्य परीक्षण तथा परामर्श लिन सक्नेछन्।शिविरमा जनरल फिजिसियन, मानसिक रोग विशेषज्ञ, महिला रोग विशेषज्ञ तथा हाडजोर्नी विशेषज्ञबाट स्वास्थ्य सेवा प्रदान गरिने संस्थाका महासचिव बाबुकाजी भण्डारीले जानकारी दिनुभयो। भदौ २७ गते बिहान १० बजेदेखि साँझ ५ बजेसम्म र भदौ २८ गते बिहान ८ बजेदेखि दिउँसो ४ बजेसम्म शिविर सञ्चालन हुने भण्डारीले बताउनुभयो ।

विशेषज्ञ चिकित्सकको सेवा लिन टाढा जानुपर्ने बाध्यता रहेका ग्रामीण तथा स्थानीय बासिन्दालाई लक्षित गरी शिविर आयोजना गरिएको हो। आयोजकका अनुसार सामान्य स्वास्थ्य समस्यादेखि मानसिक स्वास्थ्य, महिला स्वास्थ्य तथा हाडजोर्नीसँग सम्बन्धित समस्याको पहिचान, परामर्श र आवश्यक स्वास्थ्य सुझाव शिविरबाट उपलब्ध गराइनेछ।शिविरलाई ब्लड डोनर्स अफ अमेरिका, धादिङ समाज यूके र धादिङ सेवा समाज कतारले सहयोग गरेका छन् भने गल्छी गाउँपालिका स्थानीय सहयोगीका रूपमा रहेको छ।आयोजकले स्वास्थ्य समस्या भएका स्थानीय बासिन्दालाई शिविरमा सहभागी भई विशेषज्ञ चिकित्सकबाट स्वास्थ्य परीक्षण तथा परामर्श लिन आग्रह गरेको छ।