औपचारिक रुपमा सकियो धादिङबेसीमा यसबर्षको लाखेनाच

धादिङ,२२ भदौ
नेवार समुदायले गाई जात्राको दिनदेखि शुरु गरेको लाखे जात्रा (लाखेनाच)को आजबाट विधिवत रुपमा समापन गरेका छन्। झिंगु नेवाः समाज धादिङको अगुवाईमा सुरु भएको जात्राको लाखे मारेर समापन गरिएको झिंगु नेवाः समाज धादिङका अध्यक्ष राजकुमार श्रेष्ठले बताउनुभयो। नेवार समुदायमा बढी प्रचलनमा रहेको लाखेनाच वर्षौंदेखि चल्दै आएको मौलिक, सांस्कृतिक र जातीय पहिचान हो।

धादिङमा वि स २०६२ सालमा नेवार समुदायको आधिकारिक जिल्ला स्तरीय संस्था झिंगु नेवाः समाज, धादिङ स्थापना भएपछि सोही संस्थाको पहलमा विभिन्न स्थानहरूमा लाखे जात्रा सञ्चालन हुँदै आएको छ । लाखे नाच लाखे जात्राको प्रमुख आकर्षण हो। यो नाचमा सहभागी पात्रले राक्षसको रूप धारण गर्छन्। जसका लागि ठूलो र डरलाग्दो मुखुण्डो, रातो वा कालो रङको विशेष पोशाक र विशाल आकारका माला तथा अन्य आभूषण प्रयोग गरिन्छ। लाखेले गरेको आक्रामक नाचका माध्यमबाट दुष्ट शक्तिहरूलाई परास्त गरिन्छ भन्ने मान्यता छ। लाखे नाचको विशेषता भनेको यसको भव्य र अद्वितीय प्रस्तुति हो।

डरलाग्दो भूतको रुपमा रहेको लाखेलाई भगवान कृष्णले बाँसुरी बजाएर आफ्नो मायाजालमा पारेर शिर छेदन गरि मारेको जनविश्वास छ । यो परम्परा धादिङका नेवार समुदायको आस्था र परम्परागत संस्कृतिको प्रतिविम्बको रुपमा परिचित छ । लाखे निकाल्ने दिनदेखि लाखे विसर्जनका बीचमा गाईजात्रा, रोपाइँ जात्रा, इन्द्र जात्रा लगायतका पर्वहरू मनाइन्छ। राजा गुणकाम देवको पालादेखि लाखे जात्रा सुरु गरिएको भएता पनि राजा प्रताप मल्लको पालादेखि राक्षसको स्वरूपमा मुकुट लगाइ कालिकाको वस्त्र धारण गरि लाखे नाँच नाच्ने गरिएको पाइन्छ ।