भाषा,साहित्य,सङ्गीत,कला र सस्कृतिको संरक्षण गर्ने काम स्थानीय सरकारको होः मेयर ढुंगाना

धादिङ,१५ भदौ
भाषा,साहित्य,सङ्गीत,कला,संस्कृतिको जगेर्ना गर्ने काम स्थानीय सरकारको काम रहेको नीलकण्ठ नगरपालिकाका मेयर तथा नेपाल नगरपालिका संघका अध्यक्ष भीम प्रसाद ढुंगानाले बताउनु भएको छ । स्थानीय कला संस्कृतिको संरक्षण गर्ने उदेश्यले नीलकण्ठ प्रज्ञा प्रतिष्ठानको स्थापना गरीएको बताउनुभयो । मोतिराम भट्टको १५९ औँ जन्म जयन्तीको सन्दर्भ तथा १७ औँ राष्ट्रिय पुस्तकाल दिवसको उपलक्ष्यमा आयोजित नीलकण्ठ प्रज्ञा परिषदको तेस्रो बैठकलाई सम्बोधन गर्नुहुदै उहाँले नीलकण्ठ प्रज्ञा प्रतिष्ठानले गरेको काम प्रति आफु खूसि रहेको बताउनुभयो ।

नीलकण्ठ नगरपालिकाले ऐन नै बनाएर प्रज्ञा प्रतिष्ठानको स्थापना गरेको भन्दै मेयर ढुंगानाले आगामी दिनमा पनि नीलकण्ठ नगरपालिकाले सहयोग गर्ने बताउनुभयो।नीलकण्ठ प्रज्ञा प्रतिष्ठानले भाषा,साहित्य,संगीत,कला,संस्कृति,ज्ञानविज्ञान,प्रविधि,समाजशासस्त्र र दर्शनशास्त्रको क्षेत्रमा काम गर्दै आईरहेको भन्दै उहाँले आगामी दिनमा जिल्ला भरको नेतृृत्व गर्नको लागि आग्रह गर्नुभयो । नीलकण्ठ नगरपालिकाको नव निर्मित भवन निर्माण पश्चात नीलकण्ठ प्रज्ञा प्रतिष्ठानको लागि पुस्तकालय स्थापनाको लागि कोठा उपलब्ध गराउने उद्घोष गर्नुभएको छ ।

नीलकण्ठ प्रज्ञा प्रतिष्ठानका अध्यक्ष बद्री प्रसाद दाहालको अध्यक्षतामा सम्पन्न भएको बैठकमा नगर प्रमुख भीम प्रसाद ढुंगानाको प्रमुख आतिथ्यता रहेको थियो ।कार्यक्रममा नीलकण्ठ नगरपालिकाका प्रमुख प्रशासकीय अधिकृत पुरुषोत्तम सुवेदी,नेपाल नगर पालिका संघका सल्लाहकार सरोज अधिकारी लगात प्रज्ञा प्रतिस्ठानका पदाधिकारीहरुको उपस्थिती रहेको थियो । प्रतिष्ठानका सचिव प्रकाश पौडेलले सन्चालन गर्नुभएको कार्यक्रममा अध्यक्ष दाहालले आगामी आर्थिक बर्ष २०८१/०८२ को नीति तथा कार्यक्रम र आर्थिक बर्ष २०७९÷०८० मा सम्पन्न भएको क्रियाशलापहरुको प्रतिवेदन प्रस्तुत गर्नुभएको थियो ।