धादिङ–२ मा बोधनारायण श्रेष्ठको वाचा पत्र सार्वजनिक, “सुशासन, रोजगारी र पूर्वाधार विकास” मुख्य एजेन्डा

धादिङबेशी । राष्ट्रिय स्वतन्त्र पार्टी (रास्वपा) धादिङ–२ का उम्मेदवार बोधनारायण श्रेष्ठले आफ्नो चुनावी वाचा पत्र सार्वजनिक गरेका छन्। रुबीभ्याली, ज्वालामुखी र धादिङबेशीबाट एकसाथ आयोजित कार्यक्रममा श्रेष्ठले “सुशासनको आधार, रास्वपाको सरकार” भन्ने मूल नारासहित विकास र रूपान्तरणको स्पष्ट खाका अघि सारेका हुन्।

वाचा पत्रमा भौगोलिक विकटता, बेरोजगारी तथा वैदेशिक पलायन, कृषि उत्पादनमा गिरावट, भ्रष्टाचार र कमजोर पूर्वाधारलाई क्षेत्रका प्रमुख समस्याका रूपमा औँल्याइएको छ। यी समस्याको दीगो समाधानका लागि श्रेष्ठले सुशासन र संस्थागत सुधारलाई पहिलो प्राथमिकतामा राखेका छन्।

सुशासन र पारदर्शिता प्राथमिकतामा

श्रेष्ठले संघीय निजामती सेवा ऐन, शिक्षा ऐन र प्रहरी ऐनलगायत लामो समयदेखि अड्किएका कानुन टुंग्याउने प्रतिबद्धता जनाएका छन्। हरेक चार महिनामा संसदमा आफ्नो कार्यप्रगति सार्वजनिक गर्ने, सबै सरकारी कार्यालयको पूर्ण डिजिटाइजेसन गर्ने तथा नागरिक सहभागितामा आधारित पारदर्शी शासन प्रणाली लागू गर्ने उनको घोषणा छ।

उत्पादनमुखी अर्थतन्त्र र रोजगारी सिर्जना

कृषि, पर्यटन, उद्योग र ऊर्जालाई प्राथमिकतामा राख्दै उत्पादनमुखी अर्थतन्त्र निर्माण गर्ने योजना उनले अघि सारेका छन्। स्टार्टअप प्रवर्द्धन, सहकारी सुदृढीकरण, Contract Farming, ई–बजार प्रणाली विकास, IT तालिम र डिजिटल सीपमार्फत युवालाई स्वदेशमै रोजगारीमा जोड्ने प्रतिबद्धता व्यक्त गरिएको छ।

धादिङका उत्तरी भेगका खनिज स्रोतको वैज्ञानिक उपयोग, जडीबुटी तथा कृषि–आधारित प्रशोधन उद्योग स्थापना र ग्रामीण पर्यटन प्रवर्द्धनमार्फत स्थानीय अर्थतन्त्र सबल बनाउने उनको लक्ष्य छ।

स्वास्थ्य, शिक्षा र सामाजिक सुरक्षा

हरेक पालिकामा एम्बुलेन्स सेवा, टेलिमेडिसिन विस्तार, मातृ तथा शिशु स्वास्थ्यमा विशेष प्राथमिकता र सामाजिक सुरक्षा कार्यक्रमलाई प्रभावकारी बनाउने योजना वाचा पत्रमा उल्लेख छ।
शिक्षा क्षेत्रमा ICT पूर्वाधार विस्तार, ‘सिक्दै, कमाउँदै, रमाउँदै’ अवधारणामा आधारित व्यावहारिक शिक्षा प्रणाली लागू गर्ने र उच्च शिक्षा तथा रोजगारीबीच प्रभावकारी समन्वय गर्ने प्रतिबद्धता जनाइएको छ।

पूर्वाधार र कनेक्टिभिटीमा जोड

धादिङ–त्रिशूली सडक स्तरोन्नति, ग्रामीण सडकको नियमित मर्मत प्रणाली, उच्च गतिको इन्टरनेट सेवा विस्तार, स्वच्छ खानेपानी र सिँचाइ पूर्वाधार विस्तारलाई उनले प्राथमिक एजेन्डा बनाएका छन्। बूढीगण्डकी जलविद्युत् आयोजना निर्माणमा सहजीकरण गर्ने उल्लेख पनि वाचा पत्रमा छ।

वातावरण, विपद् व्यवस्थापन र समावेशी विकास

“हरित बस्ती, हरित सडक” अभियान सञ्चालन, वैज्ञानिक फोहोर व्यवस्थापन प्रणाली लागू, विपद् व्यवस्थापन कोष स्थापना तथा समावेशी र न्यायपूर्ण विकास नीति कार्यान्वयन गर्ने प्रतिबद्धता व्यक्त गरिएको छ।

विदेशबाट फर्किएका युवाको सीप र पूँजीलाई जिल्लाको विकासमा जोड्ने तथा Brain Drain लाई Brain Gain मा रूपान्तरण गर्ने स्पष्ट नीति ल्याउने श्रेष्ठको भनाइ छ। कार्यक्रममा बोल्दै उम्मेदवार श्रेष्ठले आफू विकास, सुशासन र जिम्मेवार नेतृत्वका लागि उम्मेदवारी दिएको उल्लेख गर्दै धादिङ–२ लाई नमूना निर्वाचन क्षेत्र बनाउने प्रतिबद्धता दोहोर्याए।

“तपाईंको एक मत, तपाईंको विकास” भन्ने अपिलसहित उनले फागुन २१ गते घण्टी चिन्हमा मतदान गर्न मतदातालाई आग्रह गरेका छन्।