धादिङमा जाली नोटको पहिचानको लागि सचेतना

धादिङबेशी । कहिलेकाहीँ बजारमा नक्कली नोटको बिगबिगी भएको सुन्ने गरिएको छ । अहिले पनि निर्वाचनको गतिविधिहरु सहित विभिन्न अवसरहरुमा हुने ठूलो आर्थिक कारोबारलाई मौका छोप्दै यस्तै गैरकानुनी कार्य हुनसक्ने भन्दै नेपाल राष्ट्र बैंक, मुद्रा व्यवस्थापन विभागले धादिङका सरोकारवालाहरुलाई “जाली नोट पहिचान सम्बन्धि सचेतना कार्यक्रम” सम्पन्न गरेको छ ।

अन्जानमा नक्कली नोट हात पर्दा सर्वसाधारण ठगिने मात्र नभएर कानुनी झमेलामा समेत पर्ने जोखिम हुनसक्ने भन्दै मुद्रा व्यवस्थापन विभागका सहायक निर्देशक कुशल श्रेष्ठले सक्कली र जाली नोट कसरि पहिचान गर्ने भनेर जानकारी गराएका थिए । उहाँका अनुसार नोट छाम्दा कागजको बनावट, प्रकाशमा हेरेर ‘पानी छाप’ र सुरक्षाका चिन्हहरु जाँच्ने जस्ता तरिकाले सर्तकता अपनाउन सकिने बताउनु भयो ।

नेपाल राष्ट्र बैंकका उपनिर्देशक रेशम बहादुर बल्छौडीका अनुसार जाली नोटको छपाई, ओसारपसार तथा कारोबार गर्नु कानुनी रूपमा अपराध हो र यसमा संलग्न हुनेहरूलाई जरिमाना वा कैदको सजाय हुनसक्ने व्यवस्था रहेको छ । यसैले सर्वसाधारणलाई नोटको सुरक्षण र पहिचानबारे अवगत गराउनु आवश्यक रहेको उहाँले बताउनु भयो ।

कार्यक्रममा विभिन्न बैंक, वित्तीय संस्था, नेपाल प्रहरी, सशस्त्र प्रहरी, बिद्याथी तथा व्यवसायीहरूको सहभागिता रहेको थियो । कार्यक्रम राष्ट्रिय बाणिज्य बैङ्क धादिङबेशी शाखाको संयोजनमा धादिङबेशी स्थित सिटीहलमा सोमबार सम्पन्न भएको राष्ट्रिय बाणिज्य बैङ्क धादिङबेशी शाखाका प्रमुख दिपक निरौलाले जानकारी दिनुभयो ।

तस्विरमा हेर्नुहोस कार्यक्रमका केहि झलकहरु