आचारसंहिता पालना गर्दै मतदाता शिक्षामा केन्द्रीत हुन गैरसरकारी निकायलाई आग्रह

धादिङबेशी । आगामी फागुन २१ गते सम्पन्न हुने प्रतिनिधि सभा निर्वाचनका लागि निर्वाचन आचारसंहिता लागु भएको सन्दर्भमा जिल्ला सुरक्षा समिति धादिङले गैरसरकारी निकायलाई आचारसंहिता कडाइका साथ पालना गर्न आग्रह गरेको छ ।

जिल्ला सुरक्षा समितिको आयोजनामा गैरसरकारी संस्थाका प्रमुख तथा प्रतिनिधिहरुसँग अन्तरक्रिया कार्यक्रम आयोजना गरिएको हो । कार्यक्रममा प्रमुख जिल्ला अधिकारी विजयराज सुवेदीले निर्वाचनलाई निष्पक्ष, स्वतन्त्र र विश्वसनीय बनाउन गैरसरकारी संस्थाहरुले आचारसंहिता विपरितका गतिविधि नगर्न आग्रह गर्नुभयो ।

संचारकर्मीको उपस्थितिमा सम्पन्न छलफल कार्यक्रममा विकास र अधिकारका क्षेत्रमा क्रियाशील गैरसरकारी संस्थाहरुले निर्वाचन आचारसंहिता बमोजिम हाल संचालनमा रहेका सबै कार्यक्रम स्थगित गर्न आग्रह गरिएको थियो । राहत वितरण, अनुदान तथा विकासका नाममा गरिने गतिविधि तत्काल रोकेर मतदाता शिक्षामा मात्र केन्द्रीत हुन निर्देशन दिइएको थियो ।

कार्यक्रममा सहायक प्रमुख जिल्ला अधिकारी मोहन न्यौपाने, जिल्ला प्रहरी प्रमुख प्रहरी उपरिक्षक सुमित खड्का लगायत विभिन्न सुरक्षा निकायका प्रमुखहरुको सहभागिता रहेको थियो ।

यस्तो छ निर्वाचन आचारसंहिता अनुगमन अधिकृतको कार्यालयबाट जारी भएको सूचना