सलाङ स्वास्थ्य चौकीमा निशुल्क स्वास्थ्य शिविर तथा न्यानो कपडा वितरण

धादिङ,२० पुस
सिद्धलेक गाउँपालिका वडा नम्बर ३ सलाङस्थित स्वास्थ्य चौकीमा बृहत स्वास्थ्य शिवर तथा न्यानो कपडा वितरण गरीएको छ। सशस्त्र प्रहरी बल धादिङको आयोजना तथा सिद्धलेक गाउँपालिकाको सह–आयोजनामा निःशुल्क स्वास्थ्य शिविर सम्पन्न भएको छ ।सिद्धलेक गाउँपालिका वडा नम्बर ३ सलाङस्थित स्वास्थ्य चौकीमा सञ्चालन गरिएको शिविरमा विशेषज्ञ चिकित्सकहरूद्वारा विभिन्न स्वास्थ्य सेवा प्रदान गरिएको थियो ।

शिविरमा जनरल स्वास्थ्य परीक्षण, पाठेघर खस्ने समस्याको जाँच तथा भिआईए परीक्षण, गर्भवती महिलाहरूका लागि भिडियो एक्स–रे सेवा, दाँतसम्बन्धी सम्पूर्ण उपचार सेवा तथा निःशुल्क औषधी वितरण गरिएकोे छ । जाडो समयमा विपन्न नागरिकहरुलाई निशुल्क न्यानो कपडा वितरण गरीएको हो ।

कार्यक्रमलाई सम्बोधन गर्दै सिद्धलेक गाउँपालिकाका अध्यक्ष परशुराम खतिवडाले गाउँपालिकाले स्वास्थ्य क्षेत्रलाई प्राथमिकतामा राख्दै जनताको हकहितका लागि यस्ता स्वास्थ्य शिविरहरू गाउँ–गाउँमा सञ्चालन गर्दै आएको बताउनुभयो । उहाँले आगामी दिनमा पनि नागरिकको पहुँच सहज हुने गरी स्वास्थ्यसम्बन्धी कार्यक्रमलाई निरन्तरता दिने प्रतिबद्धता व्यक्त गर्नुभयो ।स्वास्थ्य शिविरबाट स्थानीय बासिन्दाहरू प्रत्यक्ष लाभान्वित भएका छन् ।