आमाको माया छात्राबासमा पानी शुद्धिकरणको लागी फिल्टर हस्तान्तरण

धादिङबेशी,१९ पौष । धादिङ जिल्लाको नीलकण्ठ नगरपालिका वडा नम्बर ४ स्थित आमाको माया छात्रावासलाई अत्याधुनिक पानी शुद्धिकरण फिल्टर वितरण गरिएको छ ।
शितल छहारी नेपालको आर्थिक सहयोग तथा लायन्स क्लब अफ धादिङ भैरवीको संयोजनमा शुक्रबार आयोजित एक कार्यक्रममा करिब १ लाख ५० हजार रुपैयाँ बराबरको शुद्ध पिउने पानी छान्ने फिल्टर छात्रावासलाई हस्तान्तरण गरिएको हो ।

हस्तान्तरण समारोहमा शितल छहारी नेपालका अध्यक्ष तथा लायन्स क्लब अफ डिष्ट्रिक्ट ३२५ आईका रिजन ५ का रिजन चेयरपर्सन कृष्ण बद्री पौडेल, लायन्स क्लब अफ धादिङ भैरवीका अध्यक्ष बद्री अधिकारी, प्रथम उपाध्यक्ष प्रकाश सापकोटा, पूर्व उपाध्यक्ष बालकृष्ण नेपाली लगायतको उपस्थिति रहेको थियो ।

कार्यक्रममा आमाको माया छात्रावासका सचिव राजेन्द्र राना मगरले सहयोगी दाताहरूलाई धन्यवाद दिँदै प्राप्त सामग्रीको सदुपयोग गर्ने प्रतिबद्धता व्यक्त गर्नुभयो । उहाँले यसअघि पनि लायन्स क्लब अफ धादिङ भैरवीले छात्रावासमा शौचालय निर्माणमा सहयोग गरेको स्मरण गर्दै आभार प्रकट गर्नुभयो ।

सहयोग सामाग्री हस्तान्तरणबाट छात्रावासमा बसोबास गर्ने बालबालिकाहरूलाई सुरक्षित र शुद्ध पिउने पानीको सुविधा सहज हुने विश्वास गरिएको छ ।