धादिङमा पालिका स्तरीय स्वास्थ्य आकस्मिकता योजना निर्माण

धादिङ, कात्तिक १९ गते ।
धादिङ जिल्लामा पालिका स्तरीय स्वास्थ्य आकस्मिकता योजना निर्माण गरिएको छ । जनस्वास्थ्य कार्यालय धादिङको सहजिकरणमा १३ वटै पालिकामा योजना निमार्ण गरिएको हो ।

जनस्वास्थ्य निरीक्षक तोयानाथ छत्कुलीका अनुसार यस आर्थिक वर्षमा नेत्रावती डबजोङ, खनियावास र गंगाजमुना गाउँपालिकामा स्वास्थ्य आकस्मिकता योजना निर्माण गरिएको छ । बाँकी दश वटा पालिकामा गत वर्ष नै निमार्ण भइसकेको थियो ।

स्थानीय तहमा स्वास्थ्य सेवाको पहुँच, जनशक्ति, स्रोत र आवश्यक सामग्रीको व्यवस्थापनका साथै आकस्मिक तयारी र जोखिम व्यवस्थापनमा सुधार ल्याउने उद्धेश्यले स्वास्थ्य आकस्मिकता योजना निर्माण गरिएको हो ।

स्वास्थ्य शाखामार्फत तयार गरिने यस योजनाले प्रत्येक पालिकामा प्राथमिक स्वास्थ्य सेवाको अवस्था, जनस्वास्थ्य चुनौती, श्रोतको उपयोग र आगामी योजना निर्माण र कार्यान्वयनमा मार्गदर्शन गर्ने अपेक्षा गरिएको छ।

जनस्वास्थ्य कार्यालयका अनुसार सबै पालिकामा योजना निमार्णसँगै स्वास्थ्य सेवामा पर्नसक्ने महामारी, विपद् जस्ता समस्या सामाधान तथा व्यवस्थापनमा थप प्रभावकारी हुने जनाइएको छ।