नेत्रावती डबजोङ गाउँपालिकामा अनिवार्य तथा निःशुल्क शिक्षा घोषणा

धादिङबेशी, ३१ जेष्ठ । धादिङको नेत्रावती डबजोङ गाउँपालिकालाई अनिवार्य तथा निःशुल्क शिक्षा लागू भएको पालिका घोषणा गरिएको छ । शुक्रबार सेमजोङ स्थित पालिका परिसरमा एक कार्यक्रमको आयोजना गरि अनिवार्य तथा निःशुल्क शिक्षा घोषणा गरिएको हो ।

कार्यक्रममा नेत्रावती डवजोङ गाउँपालिकाका अध्यक्ष मेघनाथ रिजालले अनिवार्य तथा निःशुल्क शिक्षा लागू भएको पालिका घोषणा गर्नु भएको थियो ।

गाउँपालिकाभित्र रहेका ३२ सय ६५ घरधुरीमा गरेको सर्वेक्षण, अभिभावक शिक्षालगायत कार्यक्रमबाट विद्यालय बाहिर रहेका ७ जना बालबालिकालाई विद्यालयमा भर्ना गरिएपछि नेत्रावती डबजोङलाई निःशुल्क तथा अनिवार्य शिक्षा लागुभएको गाउँपालिका घोषणा गरिएको हो ।

घोषणासँगै गाउँपालिकाले यसलाई प्रभावकारी बनाउन गरीब तथा विपन्न परिवारका विद्यार्थीलाई निशुल्क पोशाक तथा शैक्षिक सामग्रीसमेत प्रदान थियो । कार्यक्रममा नेत्रावती डवजोङ गाउँपालिकाका उपाध्यक्ष सिता चोदेन,प्रमुख प्रशाशकीय अधिकृत हरेराम शाह,वडा अध्यक्षहरु, निर्वाचित जनप्रतिनिधिहरु,बिद्यालयका ब्यवस्थापन समितिका अध्यक्ष, प्रध्यानाध्यापकहरु लगाएतको सहभागीता रहेको थियो ।