गंगाजमुनामा शैक्षिक क्षेत्रको सुधार र विकासका लागि अन्तरक्रिया

धादिङ,०५ जेठ ।
गंगाजमुना गाउँपालिकामा शैक्षिक क्षेत्रको सुधार र विकासका लागि अन्तरक्रिया कार्यक्रम सम्पन्न भएको छ । जिल्ला समन्वय समिति धादिङको आयोजनामा आयोजित उक्त कार्यक्रममा स्थानीय शैक्षिक अवस्था, चुनौतीहरू र सम्भावनाहरूबारे गहन छलफल गरिएको थियो ।

कार्यक्रमका बारेमा जानकारी दिँदै जिल्ला समन्वय अधिकारी रामश्राय यादवले शैक्षिक क्षेत्रमा भएका राम्रा अभ्यासलाई प्रवद्र्धन गर्दै अरुलाई समेत सिकाउने उद्देश्य रहेको बताउनुभयो । उहाँले भन्नुभयो, “कतिपय चुनौतीहरू अझै पनि छन् । ती हटाउन सकियो भने शैक्षिक क्षेत्रमा ठूलो अवसर सिर्जना गर्न सकिन्छ ।” कार्यक्रमको मूल उद्देश्य कानुनी र नीतिगत प्रावधानहरूको जानकारी दिनु, विद्यमान समस्या र कमजोरीहरू पहिचान गर्नु तथा सुधारका उपायहरूमा केन्द्रित हुनु रहेको अधिकारीले स्पष्ट पार्नुभयो ।

समन्वय प्रमुख नवराज अधिकारीले शैक्षिक क्षेत्रमा के कस्ता राम्रा अभ्यासहरू भइरहेका छन्, चुनौतीहरू के–के छन्, र सम्भावना तथा समाधानहरू के हुन सक्छन् भन्ने विषयमा सरोकारवालाबीच खुला अन्तरक्रिया गरिएको बताउनुभयो ।

अन्तरक्रिया कार्यक्रममा गंगाजमुना गाउँपालिकाको वर्तमान शैक्षिक अवस्थाको समिक्षा गरिएको थियो । सहभागीहरूले सुधारका उपायहरूबारे खुलेर विचार विमर्श गरेका थिए ।

जिल्ला समन्वय समितिका प्रमुख नवराज अधिकारीको अध्यक्षता र गंगाजमुना गाउँपालिका अध्यक्ष भक्तबहादुर लामाको प्रमुख आतिथ्यमा कार्यक्रम सम्पन्न भएको हो। कार्यक्रममा गाउँपालिका उपाध्यक्ष रामेश्वर सिंखडा, प्रमुख प्रशासकीय अधिकृत सन्जय बहादुर स्याङतान, जनप्रतिनिधि तथा कर्मचारीहरूको उपस्थिति रहेको थियो।