नीलकण्ठ–१३ का गृहिणी महिलाहरुलाई लक्षित गर्दै ब्युटिसियन तालिम सञ्चालन

धादिङ,११ बैशाख ।
नीलकण्ठ नगरपालिका वडा नं. १३ का गृहिणी महिलाहरुलाई लक्षित गर्दै ब्युटिसियन सम्बन्धी आधारभूत तालिम सञ्चालन गरिएको छ । नीलकण्ठ नगरपालिकाको आयोजनामा, बागमती प्रदेश सरकार अन्तर्गत सामाजिक विकास मन्त्रालय तथा सामाजिक विकास कार्यालय गजुरीको सहकार्यमा तालिम संचालन गरिएको हो ।

गृहिणी महिला सशक्तिकरण कार्यक्रम अन्तरगत संचालन गरिएको ब्युटिसियन तालिममा वडाभित्रका १० जना गृहिणी महिलाहरुको सहभागिता रहेको छ ।

कार्यक्रमको उद्धघाटन सत्रमा नीलकण्ठ नगरपालिकाका प्रमुख प्रशासकीय अधिकृत पुरुषोत्तम सुवेदीले नगरपालिकाले नागरिकलाई स्वरोजगारी बनाउन विभिन्न नीतिहरु ल्याएको बताउनुभयो । महिलाहरूलाई व्यवसायिक मार्गमा अघि बढ्न प्रोत्साहित गर्दै भन्नुभयो, यो तालिम त्यसैको एक भाग हो । धैर्यता राख्दै आफ्नो व्यवसाय सुरु गर्नुस्, पक्कै सफलता मिल्नेछ।“

सामाजिक विकास समितिका संयोजक मञ्जु थापा मगरले गृहिणी महिलाहरूलाई तालिममार्फत आर्थिक रूपमा सक्षम बनाउनु नै प्रमुख उद्देश्य रहेको बताउनुभयो ।

त्यस्तै वडा नं १३ का कार्यबहाक वडा अध्यक्ष राम्री नेपालीले भन्नुभयो, “सिर्फ तालिममा सहभागी हुन मात्र होइन, यहाँबाट केही सिकेर आफूले केही गर्न सकिन्छ भन्ने आत्मबल र आत्मविश्वाससहित अघि बढ्न आग्रह गर्नुभयो । तालिमपछि महिलाले व्यवसाय सुरु गरी वडा नं. १३ लाई स्वरोजगारको नमुना वडा बनाउने आशा र अपेक्षा लिएको नेपालीले बताउनुभयो ।

गृहिणी महिलामासीप विकास तालिमको आवश्यकता र प्रभावबारे कार्यक्रम संयोजक तथा महिला विकास निरीक्षक निर्मला केसीले चर्चा गर्नुभयो । उहाँले गृहणी महिलाहरुलाई आत्मनिर्भर बनाउँदै स्वरोजगारतर्फ उन्मुख गराउने उद्धेश्यले तालिम संचालन गरिएको बताउनुभयो ।

वडा नं १३ का कार्यबहाक वडा अध्यक्ष राम्री नेपालीको अध्यक्षतामा भएको कार्यक्रममा नीलकण्ठ नगरपालिकाका प्रमुख प्रशासकिय अधिकृत पुरुषोत्तम सुवेदीको प्रमुख आतिथ्यता रहेको थियो ।

कार्यक्रममा सामाजिक विकास समितिका संयोजक मन्जु थापा मगर, सूचना प्रविधि अधिकृत राजकुमार श्रेष्ठ, महिला विकास निरीक्षक तथा कार्यक्रम संयोजक निर्मला केसीवडा सदस्य एलिना राइ लगायत तालिममा सहभागिहरुको उपस्थिति रहेको थियो।