नेत्रावती डबजोङको विन्दुकेशर महादेव मन्दिरमा रामनवमीका दिन विशेष मेला लाग्दै

धादिङ, १४ चैत्र ।

अस्मिता पोखरेल

धादिङको नेत्रावती डबजोङ गाउँपालिकामा रहेको विन्दुकेशर महादेव मन्दिरमा रामनवमीका दिन विशेष मेला लाग्दैछ । नेत्रावती डबजोङ गाउँपालिका वडा नं ३ र ४ मा पर्ने विन्दुकेशर महादेव मन्दिरमा पूजा–आराधना गरे मनोकांक्षा पूरा हुने जनविश्वास रहेको । हरेक वर्ष हजारौं भक्तजन पूजाआजा गर्न आउँछन् ।

पूर्वमा नुवाकोट र पश्चिममा धादिङको सिमानामा रहेको यो मन्दिर प्राकृतिक सुन्दरताले भरिपूर्ण छ। विन्दुकेशर महादेव र श्री पार्वती स्थान मन्दिर धार्मिक सहिष्णुता, सांस्कृतिक मौलिकता, र जातीय भाइचाराको प्रतीक मानिन्छ । विशेष गरी कार्तिक महिनाको हरिबोधनी एकादशी र त्यसपछिको पञ्चमीमा भव्य मेला लाग्छ ।

वि.सं. २०२२ देखि चैत्र महिनाको रामनवमीमा पनि विशेष मेला लाग्न थालेको हो । यस मेलाले पछिल्लो समय स्थानीय पर्यटनलाई समेत प्रवद्र्धन गरिरहेको छ। धादिङ, नुवाकोट, चितवन, गोर्खा, रसुवा, सिन्धुपाल्चोक , काठमाडौका साथै भारतबाट समेत दर्शनार्थीहरू आउने गरेका छन्।

महादेवको मूर्ति पहिले सानो शिला मात्र थियो भन्ने जनविश्वास छ, तर समयसँगै यसको आकार ठूलो बन्दै गएको छ । यस्तै, पार्वती स्थानको चट्टान पनि वर्षेनी बढ्दै गएको स्थानीय वृद्धवृद्धाहरू बताउनुहुन्छ । साथै, कुष्ठरोग (कोर) निको पार्न यहाँ पूजा गर्ने परम्परा रहेको छ।

भनिन्छ, भङ्याङभुरुङ खोलामा स्नान गरी विधिपूर्वक पूजा गरे कुष्ठरोग समेत निको हुन्छ । धार्मिक आस्थासँगै प्राकृतिक उपचारको विश्वासले पनि भक्तजनलाई आकर्षित गरिरहेको छ।

शिवरात्रि, हरिबोधनी एकादशी, पञ्चमी, र रामनवमीमा विशेष चहलपहल हुने यो स्थान धार्मिक पर्यटकका लागि उत्कृष्ट गन्तव्य बन्दै गएको छ।

गाउँपालिकाले मन्दिरको पुनर्निर्माण र अन्य भौतिक संरचना निर्माण गर्दै मन्दिरलाई थप व्यवस्थित बनाउने योजना अगाडि सारेको छ। आगामी वर्षहरूमा पनि संरचना विस्तार र प्रचार–प्रसारलाई प्राथमिकता दिइने गाउँपालिका अध्यक्ष मेघनाथ रिजालले बताउनुभयो ।

विन्दुकेशर महादेव मन्दिर धादिङको सदरमुकाम धादिङबेसी देखि करिव २४ किलोमिटर र नुवाकोटको सदरमुकाम विदुर देखि करिव १९ किलोमिटर दुरीमा अवस्थित छ । मध्यपहाडी राजमार्ग देखि भने करिव ३ किलोमिटर भित्र पर्दछ ।