धादिङको पशुपति मन्दिरमा बाला चतुर्दशीको अवसरमा भव्य मेला र धार्मिक कार्यक्रम हुँदै

धादिङ, १३ मंसिर ।
नीलकण्ठ नगरपालिका वडा नं १२ स्थित ऐतिहासिक तथा धार्मिक स्थल पशुपति मन्दिरमा बाला चतुर्दशीको अवसरमा भव्य मेला र धार्मिक कार्यक्रम आयोजना हुने भएको छ। नीलकण्ठ नगरपालिका १२ नं वडा कार्यालयको आयोजना तथा पशुपति मन्दिर क्षेत्र व्यवस्थापन समिति र पशुपति टोल विकास संस्थाको सह आयोजनामा भोलि शुक्रबार मेला लाग्ने भएको हो ।

भोलि बेलुकी दिवंगत पितृको नाममा बत्ती बालि रातभर भजन किर्तन गरी मेला लाग्दैछ । प्रत्येक वर्ष मार्गशीर्ष कृष्ण त्रयोदशीका दिन बेलुकी धादिङका पशुपति मन्दिरहरुमा दिवंगत पितृका नाममा महादीप बाली भजनकीर्तन र लोक झाँकी प्रस्तुत गरी रात बिताउने गर्छन् ।

बाला चतुर्दशी, जसलाई हिन्दू धर्मावलम्बीहरूले अत्यन्तै पवित्र दिनका रूपमा मनाउँछन्, यस वर्ष पनि स्थानीय भक्तजनहरूको व्यापक सहभागितामा मनाउन तयारी भइरहेको वडा नं १२ का वडा अध्यक्ष धर्मराज भण्डारीले बताउनुभयो ।

नीलकण्ठ नगरपालिकाको सांस्कृतिक र धार्मिक महत्त्वलाई उजागर गर्दै धार्मिक पर्यटनलाई प्रवर्द्धन गर्नु मेलाको मुख्य उद्धेश्य हो । साथै, यो अवसरले नगरवासीहरूबीच धार्मिक र सामाजिक एकता कायम गर्ने विश्वास लिएको अध्यक्ष भण्डारीले बताउनुभएको छ । वडा अध्यक्ष भण्डारीले मेलामा सहभागी मेलामा सहभागी भई आफ्नो धर्म, संस्कृति र परम्परा प्रति सम्मान प्रकट गर्न सम्पूर्ण नगरवासी र भक्तजनलाई आग्रह गर्नुभएको छ ।

पशुपति मन्दिरलाई धार्मिक र सांस्कृतिक दृष्टिकोणले विशेष महत्त्व दिइन्छ। यस मन्दिरमा हरेक वर्ष बाला चतुर्दशीको दिन श्रद्धालुहरूको घुइँचो लाग्ने गर्दछ। मन्दिर प्रांगणमा पूजा–अर्चना, शतबीज छर्ने कार्य, दीप प्रज्वलन, र विभिन्न धार्मिक अनुष्ठानहरूले मेलालाई थप उल्लासमय बनाउने विश्वास छ। श्रद्धालुहरूले सात प्रकारका बीजहरू छर्दै दिवंगत आत्माहरूको शान्तिका लागि प्रार्थना गर्नेछन्। साथै, स्थानीय धार्मिक गुरुहरूले धर्म, संस्कृति, र जीवनका विविध पक्षमाथि प्रवचन दिनेछन्।