ज्वालामुखीको वडा नम्बर ६ नमुना,सफा तथा स्वच्छ वडा घोषणा

धादिङ,१२ कार्तिक
धादिङको ज्वालामुखी गाउँपालिका वडा नम्बर ६ लाई पहिलो नमुना सफा तथा स्वच्छ वडा घोषणा गरिएको छ ।आईतबार एक कार्यक्रमको आयोजना गरि नेपाल सरकारका कृषि तथा पशपन्क्षी बिकास मन्त्री रामनाथ अधिकारीको प्रमुख आतिथ्यतामा उक्त घोषणा कार्यक्रम सम्पन्न भएको हो । स्वास्थ्य, सरसफाई तथा स्वच्छताको ५ वटा व्यवहार, १५ वटा सूचक र ४५ वटा उपसूचक पूरा गरेर आईतबार नमूना सफा र स्वच्छ वडा घोषणा गरिएको हो ।

कार्यक्रमलाई सम्बोधन गर्नुहुदै मन्त्री अधिकारीले आफुले कृषकहरुको हकहितको लागि काम गरीरहेको बताउनुभयो ।ज्वालामुखी गाउँपालिकाले जनमैत्री काम गरीरहेको बतउनुभयो।ज्वालामुखी गाउँपालिका वडा नं ६ को आयोजना, सामुदायिक रूपान्तरण समाज नेपाल,शान्ति नेपाल, ज्वालामूखी गाउँपालिका र ज्वालामूखी ग्रामीण खानेपानी सरसफाई तथा स्वच्छता व्यवस्थापन बोर्डको सहयोग तथा साझेदारीमा कार्यक्रम गरिएको हो ।

खानेपानी, सरसफाई तथा स्वच्छता कार्यक्रम अन्तरगत २०७६ माघ २९ गते सोही वडाको केही टोल बस्तीबाट धादिङ जिल्लामा नै नमूना सफा र स्वच्छ क्षेत्र घोषणा कार्यक्रम शुरु भएको थियो ।आईतबार ज्वालामुखी गाउँपालिका वडा नं ६ लाई नमूना सफा तथा र स्वच्छ घोषणा गर्दै आर्थिक वर्ष २०८२–०८३ सम्ममा पूरै गाउँपालिका नमूना सफा र स्वच्छ गाउँपालिका घोषणा गरिने लक्ष्य रहेको गाउँपालिका अध्यक्ष यमनाथ दनैले बताउनुभयो ।

साथै गत शनिबार वडा नं १ को काफलस्वाँरा, देवीस्थान र अधिकारी गाउँटोललाई पनि नमुना सफा तथा स्वच्छ गाउँ घोषणा गरीसकिएको स्वास्थ्य शाखा प्रमुख सुजन श्रेष्ठले जानकारी दिनुभयो ।आगामी कार्तिक १४ गते वडा नम्बर ३ स्थितका केहि गाउँलाई पनि नमुना टोल बिकासको रुपमा घोषणा गरिने गाउँपालिकाले जनाएको छ ।