स्वास्थ्य स्वयंसेविकाहरुलाई बार्षिक खाजा खर्च उपलब्ध गराईने मेयर ढुंगानाको घोषणा

धादिङ,३२ साउन
नीलकण्ठ नगरपालिका भित्र कार्यरत स्वास्थ्य स्वयंसेविकाहरुलाई बार्षिक खाजा भत्ता उपलब्ध गराईने नगर प्रमुख भीम प्रसाद ढुंगानाले घोषणा गर्नुभएको छ । शुक्रबार धादिङबेसीमा स्वास्थ्य स्वयंसेविकाहरुको भेलालाई सम्बोधन गर्नुहुदै बार्षिक तीन हजार रुपैँया खाजा खर्च उपलब्ध गराउने घोषणा गर्नुभएको हो । चालु आर्थिक वर्षको साउन महिनाबाट लागु हुने गरी नगरपालिका भित्रका स्वयंयमसेविकाहरुलाइ वार्षिक तीन हजार खाजा खर्च दिन लागिएको हो ।

जनताको घर–घरमा गएर निस्वार्थ काम गर्ने स्वयंसेविकाहरुलाई प्रोत्साहनको लागि थोरै भएपनि बार्षिक तीन हजार दिने निर्णय गरेको बताउनुभयो । मेयर ढुंगानाले महिला स्वयंसेविकाहरुलाई मेयर उद्यमशीलता तालिम लिनको लागि समेत आग्रह गर्नुभएको छ । तालिम लिएर १५ लाख सम्मको सहुलियत पुर्ण कर्जामा ऋण लिनको लागि आग्रह गर्नुभएको छ । नगरपालिकाले महिलाको लागि ६ प्रतिशत व्याज ४ बर्ष सम्म सम्म तिरीदिने भन्दै उहाँले मेयर उद्यमशिलतामा जोडिनको लागि आग्रह गर्नुभएको हो ।

नेपाल स्वास्थ्य स्वयमंसेवक संघका केन्द्रीय अध्यक्ष वसन्ती महर्जनको अध्यक्षतामा सम्पन्न भएको कार्यक्रममा नगर प्रमुख भीम प्रसाद ढुंगानाको प्रमुख आतिथ्यता रहेको थियो । कार्यक्रममा निमित्त प्रमुख प्रशासकीय अधिकृत तथा वरिष्ठ जनस्वास्थ्य अधिकृत विष्णु प्रसाद रिजाल, जनस्वास्थ्य कार्यालय धादिङका प्रमुख विभु कुमार झा,जनस्वास्थ्थय निरिक्षक शिव राना लगायतको आतिथ्यता रहेको थियो ।