२०औं रक्तदाता दिवसको अवसरमा धादिङबेसीमा बृहत खुल्ला रक्तदान

धादिङ,३२ जेठ
सदरमुकाम धादिङ बेसीमा २०औं रक्तदाता दिवसको अवसरमा बृहत खुल्ला रक्तदान कार्यक्रम सम्पन्न भएको छ ।बिहिबार जनस्वास्थ्य कार्यलय धादिङको आयोजनामा भएको रक्तदान कार्यक्रममा १३ जना महिला र ४६ जना पुरुष गरेर जम्मा ५९ जनाले रक्तदान गरेका छन् । ‘नियमित रुपमा रगत तथा प्लाज्मा दान गरौँ, जीवन बचाउने कार्यमा हातेमालो गरौँ’ भन्ने नाराका साथ विश्व रक्तदाता दिवसको अवसरमा रक्तदान कार्यक्रम सम्पन्न भएको हो ।

रक्तदान कार्यक्रमको प्राविधिक सहयोग नेपाल रेडक्रस सोसाइटी धादिङले गरेको थियो । अमेरिकी जीव बैज्ञानिक, चिकित्सक, र इम्युनोलोजिस्ट तथा रक्तसमुहहरुको खोजकर्ता कार्ल ल्यान्डस्टेनरको सम्मानमा उनकै जन्ममितीलाई आधार मानेर सन् २००४ देखि विश्व रक्तदाता दिवस मनाउन थालिएको हो । हाल देशै भरी भैरहेको रगतको अभावलाई न्यूनीकरण गर्न रक्तदान कार्यक्रम राखिएको स्वाथ्य कार्यालय धादिङले जनाएको छ ।