नीति कार्यक्रम र बजेटमा समेट्नुपर्ने विषयमा सुझाव संकलन गर्दै नीलकण्ठ नगरपालिका

धादिङ,२७ जेठ
नीलकण्ठ नगरपालिकाले नीति तथा कार्यक्रम बनाउन विभिन्न सरोकारवालाहरुसँग सुझाव संकलन कार्यक्रम सम्पन्न गरेको छ । आगामी आर्थिक बर्ष २०८१÷०८२ को नीति कार्यक्रम तथा बजेट निर्माण गर्नको लागि नगरपालिकाले उक्त कार्यक्रमको आयोजना गरेको हो ।कार्यक्रममा विभिन्न पक्षका सरोकारवालाहरुले आ—आफ्नो राय सुझाव दिनुभएको थियो । कार्यक्रमलाई सम्बोधन गनुहुर्दै नीलकण्ठ नगरपालिकाका कार्यवाहक मेयर दिपक विश्वकर्माले यो महत्वपूर्ण कार्यक्रम भएको हुनाले सकेसम्म सबैको सल्लाह सुझाव लाई समेटेर जाने बताउनु भएको छ ।आगामी दिनमा विभिन्न व्यक्तिहरुले दिएको सुझावले गर्दा नगरपालिकालाई नीति था कार्यक्रम बनाउन सजिलो हुने उहाँले बताउनु भयो ।यस बर्ष नगरपालिकाले केही नयाँ कार्यक्रम ल्याउने विश्वकर्माको भनाई छ ।

अपराधमा न्युनीकरण र आत्महत्या न्युनीकरणमा नगरपालिकाले ध्यान दिनुपर्ने प्रमुख जिल्ला अधिकारी राजेन्द्रदेव पाण्डेले बताउनु भयो । नगरपालिकाले आगामि आर्थिक बर्षको नीति तथा कार्यक्रम बनाउदा वास्तविक किसान लाई लक्षित गरेर कार्यक्रम ल्याउनुपर्ने, फोहोरको व्यवस्थापन ,खानेपानीको समस्या सामाधान गर्नुपर्ने लगायतको सुझाव नागरिकहरुले दिनुभएको थियो ।

त्यस्तै कार्यक्रममा जेष्ठ नागरिक प्रति नगरपालिकाले गरेको काम एकदम राम्रो भएको भन्दै सवारीसाधनमा जेष्ठ नागरिक लाई तोकेको ठाउँ नपाएको गुनासो जेष्ठ नागरिकले राख्नुभएको थियो । नगरपालिकाको कार्यवाहक मेयर दिपक विश्वकर्माको अध्यक्षतामा सम्पन्न भएको कार्यक्रममा प्रमुख जिल्ला अधिकारी राजेन्द्रदेव पाण्डे,नगरपालिकाका प्रमुख प्रशासकिय अधिकृत पुरुषेत्तम सुवेदी,नीलकण्ठ नगरपालिकाका प्रवक्ता तथा वडा नम्बर ८ का वडा अध्यक्ष प्रकाश कुमार श्रेष्ठ,अन्य वडा अध्यक्षहरु,कार्यापालिका सदस्यहरु,जिल्ला स्थित सरकारी कार्यालयका प्रमुखहरु,नागरिक समाज,पत्रकार,गैर सकारी संघ संस्था लगायत सरोकारवाला निकायका प्रमुख एवं प्रतिनिधिहरुको सहभागिता रहेको थियो ।