जेष्ठ नागरिक र स्याहारकर्ताको लागि आयोजित २ दिने अभिमुखीकरण तालिम सम्पन्न

धादिङ,१८ जेठ
जेष्ठ नागरिक र स्याहारकर्ताको लागि आयोजित २ दिने अभिमुखीकरण तालिम शुक्रबार सम्पन्न भएको छ । नीलकण्ठ नगरपालिकाको आयोजनामा बिहिबारदेखी सुरु भएको तालिममा जेष्ठ नागरिक र नमुना स्याहारकर्ता गरी ३७ जनाको सहभागिता रहेको थियो । जेष्ठ नागरिकहरुको स्याहारलाई थप प्रभावकारी बनाउन र जेष्ठ नागरिकहरुको हक अधिकारको विषयमा जानकारी गराउने उदेश्यले तालिमको आयोजना गरीएको महिला विकास निरिक्षक तथा तालिम संयोजक निर्मला केसीले जानकारी दिनुभयो ।

दुई दिन सम्म सन्चालन भएको तालिममा शाखा अधिकृत उर्मिला थपलियाले जेष्ठ नागरिकको परिचय तथा नगरपालिकामा जेष्ठ नागरिकको अवस्था र कार्यान्वयनको विषयमा सहजिकरण गर्नुभएको थियो । यसैगरी तालिममा अधिवक्ता तथा सामी कार्यक्रम संयोजक दिनेश दुवाडीले जेष्ठ नागरिक सम्बन्धि कानुनी व्यवस्था(जेष्ठ नागरिक ऐन २०६३ नियमावली र २०६४ तथा नेपालको संविधानमा भएको व्यवस्था,जष्ेठ नागरिक मन्च गठन तथा सन्चालन कार्यविधि २०७६ मा भएका व्यवस्था बारे सहजिकरण गर्नुभएको थियो ।यसैगरी तालिममा प्रशासन शाखा प्रमुख लोकनाथ उपाध्यायले अन्तरपुस्ता सीप हस्तान्तरण सम्बन्धि जानकारी गराउनु भएको थियो ।

साथै तालिममा बरिष्ठ जनस्वास्थ्य अधिकृत विष्णु रिजालले जेष्ठ नागरिकको स्वास्थ्य हेरचाह कसरी गर्ने र स्वस्थ्य रहन के कस्ता आहार विहार गर्ने भन्ने विषयमा सहजिकरण गर्नुभएको थियो भने योजना अधिकृत विवेक खतिवडाले योजनाको शाव्दिक परिभाषा,परिचय,स्थानीय तहको योजना तर्जुमा प्रकृया र जेष्ठ नागरिकका सवाल सम्बोधन लगायतको विषयमा सहिजकरण गर्नुभएको थियो ।

तालिमको अन्तिम दिन आज नीकलण्ठ नगरपालिका मनोसामाजिक परामर्शकर्ता रामकुमार थापाले जेष्ठ नागरिकहरुले भोग्नु परेको मनोसामाजिक समस्या,यसका कारण र स्याहारकर्ताहरुमा आउने तनाव व्यवस्थापन लगायतको विषयमा सहजिकरण गर्नुभएको थियो ।नगर स्तरीय जेष्ठ संघका अध्यक्ष कृष्ण बहादुर अधिकारीको अध्यक्षतामा सम्पन्न भएको समापत्र सत्रमा सामाजिक विकास समितिका सदस्य मन्जु मगर,बरिष्ठ जनस्वास्थ्य अधिकृत,विष्णु रिजाल,नीलकण्ठ नगरपालिकाका सल्लाहकार दिपक कोईराला, जिल्ला जेष्ठ नागरिक संघका अध्यक्ष बासुदेव लम्सालको आतिथ्यता रहेको थियो ।