महालेखा परिक्षकको प्रतिवेदन : धादिङमा बेरुजु शुन्य गराउन बेनिघाट सफल, कम गराउन नेत्रावती द्धिप्तीय र नीलकण्ठ तृतीय

धादिङबेशी । धादिङको बेनीघाट रोराङ गाउँपालिकाले आर्थिक वर्ष २०७९÷८० मा बेरुजु शुन्य गराउन सफल भएको छ । महालेखा परीक्षकको कार्यालयको ६१ औं प्रतिवेदन २०८१ अनुसार देश भरिबाट पाँच वटा स्थानीय तहहरुको बेरुजु शुन्य देखिँदा धादिङको बेनीघाट रोराङ गाउँपालिका पनि शुन्य बेरुजु ल्याउन सफल भएको हो ।

संघीय मामिला तथा सामान्य प्रशासन मन्त्रालयको स्वमुल्याङ्कन कार्यविधि अनुरुप ७५३ स्थानीय तह मध्ये बेनीघाट रोराङ गाउँपालिका पनि शुन्य बेरुजु ल्याउन सफल भएको छ । धादिङमा १३ स्थानिय तह मध्ये कम बेरुजु हुनेमा नेत्रावती डवजोङ गाउँपालिका दोस्रो,नीलकण्ठ नगरपालिका तेस्रो र खनियाबास गाउँपालिका चौथो बन्न सफल भएको छ ।

महालेखाले सार्वजनिक गरेको प्रतिवेदन अनुसार धादिङको नेत्रावती डवजोङ गाउँपालिकाको ० दशमलब ०.४ प्रतिशत, नीलकण्ठ नगरपालिकाले ० दशमल ४९ प्रतिशत, खनियाबास गाउँपालिकाले ० दशमलब ८३ प्रतिशत मात्र बेरुजु रहेको छ ।

त्यसैगरी गल्छी गाउँपालिकाको १ दशमलव २१ , गंगाजमुना गाउँपालिकाकोे १ दशमलव ४५, त्रिपुरासुन्दरी गाउंपालिका २ दशमलव ०२, सिद्धलेक गाउँपालिका २ दमलव ०३, रुविभ्याली गाउंपालिकाको २ दशमलव ६२, गजुरी गाउँपालिकाको २ दशमलव ७१, ज्वालामुखी गाउँपालिकाको ३ दशमलव ०४, थांक्रे गाउँपालिकाको ५ दशमलव ८२ रहेको छ ।

धादिङको १३ स्थानिय तह मध्ये सवै भन्दा बढि बेरुजु रहनेमा धुनिवेशी नगरपालिकाको ९ दशमलव १३ प्रतिशत बेरुजु जारी गरिएको प्रतिवेदनमा उल्लेख गरिएको छ ।