सडकको भित्ता खन्ने क्रममा गल्छिको २ घर जोखिममा

धादिङ,७ जेठ

पृथ्वी राजमार्ग निर्माणको क्रममा संकटमा परेको २ घर परिवार विस्थापित भएका छन् । गल्छी गाउँपालिका वडा नम्बर ६ भट्टटारका  २ घर परिवार बिस्थापित भएका हुन् ।बैरेनी स्वास्थ्य चौकी अगाडी रहेको पृथ्वीराजमार्गको भित्ता खन्ने क्रममा सडक भन्दा माथि पट्टी रहेको घरमा धाँजा फाटेपछि निजहरुलाई घर सार्नुपरेको गल्छी गाउँपालिका अध्यक्ष केदार खतिवडाले बताउनुभयो ।

सडक भित्ता पट्टीको भाग खार्न लाग्दा भट्टटारका निवासी धन बहादुर तामाङ र राजेश परियारको घर चर्किएको छ ।उनिहरुलाई नजिकै अन्य घरमा सुरक्षित राखिएको र हाल सडकको भित्ता खार्ने काम रोकिएको पनि अध्यक्ष खतिवडाले जानकारी दिनुभयो।घटनापछि सडक निर्माणको जिम्मा पाएको निर्माण कम्पनी र भुगर्वविद टोलीले स्थलगत अध्ययन गरेर क्षतीको सम्बोधन गर्ने बताईएको छ ।