धादिङमा जेठ १३ गतेदेखि आइ.पि.भी (पोलियो) खोप अभियान संचालन हुँदै

धादिङबेशी । धादिङमा जेठ १३ गतेदेखि आइ.पि.भी (पोलियो) खोप अभियान संचालन हुने भएको छ । पोलियो रोग उन्मुलन गर्ने उद्धेश्यका साथ ५ देखि ८ वर्ष उमेर समुहका बालबालिकाहरुलाई जेठ १३ देखि जेठ २६ गतेसम्म दुई चरणमा खोप अभियान संचालन हुने भएको हो ।

धादिङमा पहिलो चरणमा जेठ १३ गतेदेखि १७ गतेसम्म धुनिबेशी नगरपालिका, थाक्रे गाउँपालिका, गल्छी, गजुरी, बेनीघाट रोराङ, रुवीभ्याली, खनियावास, गङ्गाजमुना र नेत्रावती डबजोङ गाउँपालिकामा संचालन हुने छ भने दोस्रो चरणको अभियान नीलकण्ठ नगरपालिका, ज्वालामुखी गाउँपालिका र सिद्धलेक गाउँपालिकामा संचालन हुने जनस्वास्थ्य कार्यालय धादिङका निमित्त कार्यालय प्रमुख विभु कुमार झाले जानकारी दिनुभयो ।

आईतबार धादिङबेसीमा सम्पन्न जिल्ला खोप समन्वय समिति र संचारकर्मीको अभिमुखीकरण तथा अन्तरक्रिया कार्यक्रममा जिल्लाका १२ हजार ७ सय ९० जना बालबालिकालाई खोप लगाउने लक्ष्य रहेको झाले बताउनुभयो । उहाँका अनुसार जिल्लाका ४ सय ८० वटा विद्यालयमा खोप केन्द्र रहने गरी अभियान सञ्चालन हुने छ ।

जिल्ला खोप समन्वय समितिको अध्यक्षको नवराज अधिकारीको अध्यक्षतमा भएको कार्यक्रममा  समन्वय समितिका उप प्रमुख कुलमान विश्वकर्मा र प्रमुख जिल्ला अधिकारी बद्रीनाथ गैह्रे,  जनस्वास्थ्य कार्यालय धादिङका निमित्त कार्यालय प्रमुख विभु कुमार झा लगाएतको उपस्थिति रहेको थियो ।

नेपालबाट सन् २०२६ सम्म पोलियोरोग निर्मुल गर्ने लक्ष्यका साथ राष्ट्रव्यापी रुपमा यो अभियान सञ्चालन हुँदैछ ।