गंगाजमुनामा योजना कार्यान्वयन सम्बन्धि प्रशिक्षण तथा अभिमुखीकरण कार्यक्रम सम्पन्न

धादिङ,०२ पौष ।

गंगाजमुना गाउँपालिकाको वडा नं ६ र ७ मा योजना कार्यन्वयन सम्बन्धि प्रशिक्षण तथा अभिमुखीकरण कार्यक्रम सम्पन्न भएको छ ।गाउँपालिकाले पारदर्शिता, सक्षमता, गुणस्तरीयता तथा सहजताको लागि टोल विकास समिति तथा उपभोक्ता समितिहरुलाइ प्रशिक्षण तथा अभिमुखीकरण गरिएको प्रमुख प्रशासकिय अधिकृत अनिल श्रेष्ठले जानकारी दिनुभयो ।

बिकास निर्माणका कार्ययोजनाहरु कार्यन्वयन गर्दा असहज हुने, अनियमितता देखिने, काममा ढिलासुस्ती हुने, ईस्टमेट बमोजिमको कार्य प्रगतीमा कमजोर देखिने हुँदा गाउँपालिकाले प्रशिक्षण तथा अभिमुखीकरण कार्यक्रम संचालन गरेको श्रेष्ठले बताउनुभयो ।

कार्यक्रममा उपभोक्ता समितिद्वारा आर्थिक वर्ष २०८०/०८१ मा कार्यान्वयन हुने योजना तथा कार्यक्रमहरूहरूको योजनागत कानूनी तथा प्रक्रियागत विषयहरू, प्राविधिक विषयहरू र योजनासँग सम्बन्धित क्षमता विकासका विषयहरुमा छलफल गरिएको थियो ।

कार्यक्रममा सहभागि टोल विकास समिति तथा उपभोक्ता समितिहरुलाई समिति गठनको प्रक्रिया, योजनाको कार्यान्वयन तथा कार्यसम्पन्न सम्म पुरा गर्नुपर्ने प्रक्रियाहरु, भुक्तानी प्रक्रिया र प्राविधिक सम्बन्धी ज्ञानहरू बारे सम्बन्धित शाखा प्रमुखहरु तथा वडा अध्यक्षहरुले प्रशिक्षण गर्नुभएको थियो ।

गाउँपालिकाका प्रमुख प्रशासकिय अधिकृत अनिल श्रेष्ठले योजना कार्यान्वयन सम्बन्धि प्रशिक्षण तथा अभिमुखीकरण कार्यक्रमले विगतमा भएको कमि कमजोरी एवं त्रुटिहरूलाई सच्याई आगामी दिनहरूमा उपभोक्ता समितिहरूले गुणस्तरीय कार्य गरी बजेटको सही सदुपयोग गर्नेे बताउनुभयो ।

साथै आवश्यक प्रक्रिया पुगेको उपभोक्ता समितिहरुको वडा कार्यालयमै सम्झौता गरिएको श्रेष्ठले जानकारी दिनुभयो ।