जिल्लाको पहिलो नमुना,सफा र स्वच्छ गाउँपालिका घोषणा गर्ने लक्ष्य छः अध्यक्ष दनै

धादिङ्ग,२४ असोज
ज्वालामुखी गाउँपालिकाको वडा नम्बर ७ स्थित ४ टोललाई नमुना सफा तथा स्वच्छ गाउँ घोषणा गरीएको छ । बुधबार एक कार्यक्रमकाबिच गाउँपालिकाका अध्यक्ष यमनाद दनैले धारा पानी, डाँडा थोक, थापा थोक र कोट थोक गाउँलाई नमुना सफा तथा स्वच्छ गाउँ घोषणा गर्नुभएको हो । ज्वालामुखी गाउँपालिका वडा नम्बर ७ को आयोजना तथा ज्वालामुखी गाउँपालिका र शान्ति नेपालको सहयोगमा ४ टोलहरुलाई नमुना सफा तथा स्वच्छ गाउँ घोषणा गरिएको हो । नमुना सफा र स्वच्छ गाउँ घोषणा गरिएको धारा पानी, डाँडा थोक, थापा थोक र कोट थोक गाउँमा १६३ घरधुरी रहेको छ ।

नमुना, सफा र स्वच्छ गाउँ घोषणा समारोहलाई सम्बोधन गर्नुहूँदै गाउँपालिकाका अध्यक्ष यमनाथ दनैले गाउँपालिकालाई जिल्लाकै पहिलो नमुना,सफा र स्वच्छ गाउँ घोषणा गर्ने लक्ष्य रहेको बताउनुभयो ।घर घरमा गएर अनुगमन गर्दा स्वच्छ र सरसफाइ देख्दा आफुलाई खुसी लागेको भन्दै दनैले स्वस्थ्य बन्नको लागि पनि सरसफाईले ठुलो भुमिका खेल्ने बताउनुभयो । उहाँले आगामी दिनमा पनि नमुना, सफा र स्वच्छ गाउँ बनाउने कामलाई निरन्तरता दिने बताउनुभएको छ ।नेपाल सरकारको पुर्ण सरसफाइ मार्गदर्शन २०७३ अनुसार सफा र स्वच्छ टोल घोषणा हुनको लागि आवश्यक पर्ने सवै सुचकहरु पुरा गरेकाले उक्त टोलहरुलाई पुर्ण सरसफाइ युक्त स्वच्छ र सफा गाउँ घोषणा गरिएको ज्वालामुखी गाउँपालिकाका स्वास्थ्य संयोजक सुजन श्रेष्ठले जानकारी दिनुभयो।

पुर्ण सरसफाइ मार्गदर्शन २०७३ ले ५ वटा ब्यवहारहरु नियमित रुपमा चर्पीको उचित प्रयोग, ब्यक्तिगत सरसफाइ, सुरक्षित खानेपानी, सुरक्षित र स्वच्छ खाना, घर तथा आँगनको सरफाइका १५ वटा सुचकहरु पुरा गरेमा पूर्ण सरसफाईयुक्त गाउँ भन्न मिल्ने उहाँले बताउनुभयो ।
ज्वालामुखी गाउँपालिका वडा नं ७ का वडा अध्यक्ष ज्ञानेन्द्र प्रसाद खकुरालको अध्यक्षतामा भएको कार्यक्रममा गाउँ पालिकाका अध्यक्ष यमनाथ दनैको प्रमुख आतिथ्यता रहेको थियो ।गाउँपालिकाका उपाध्यक्ष धर्म बहादुर अर्यालको विशेष आतिथ्यता रहेको कार्यक्रममा स्वास्थ्य शाखा प्रमुख सुजन श्रेष्ठ, शान्ति नेपालका परियोजना संयोजक इन्द्रमान शाक्य लगायतको आतिथ्य रहेको थियो । ज्वालामुखी गाउँपालिको यसअघि वडा नं ३ को मिलिजुली टोल र सन्यासी टोल, वडा नं ५ को दुई घरे भदुवार र खाली गाउँलाई नमुना, सफा तथा स्वच्छ गाउँ घोषणा गरेको थियो ।