ढोला स्वास्थ्य चौकीमा हुने निःशुल्क स्वास्थ्य शिविरको तयारी पुरा, बैशाख ८ गते बिहान ९ बजेबाट विरामी जाँच गरिने

धादिङ,७ बैशाख
धादिङको ज्वालामुखी गाउँपालिका स्थित ढोला स्वास्थ्य चौकीमा हुने २ दिने निःशुल्क स्वास्थ्य शिविरको तयारी पुरा भएको छ विभिन्न पेशा र व्यवसाय तथा अध्ययनका लागि विश्वभर छरिएर रहेका धादिङेलीहरुको संस्था अन्तर्राष्ट्रिय धादिङ समाजको आयोजानमा बैशाख ८ र ९ गते ज्वालामुखी गाउँपालिकाको ढोला स्वास्थ्य चौकीमा निःशुल्क विशेषज्ञ स्वास्थ्य शिविर हुन लागेको हो ।

निःशुल्क विशेषज्ञ स्वास्थ्य शिविरमा, महिला रोग विशेषज्ञ डा.सरिता सिटौला, दन्त रोग विशेषज्ञ डा.दिलिप प्रजापति, जनरल सर्जन डा. गरखनाथ मिश्र, जनरल फिजिसियन डा. अमरिश थापा ,प्रो.डा. सिताराम श्रेष्ठ विशेषज्ञ टोलिहरुले सेवा प्रदान गर्ने अन्तर्राष्ट्रिय धादिङ समाजका अध्यक्ष,राजन खुकुरालले जानकारी दिनुभएको छ ।

समाजले आफ्नो पहिलो फिजिकल ‘’निःशुल्क विशेषज्ञ स्वास्थ्य शिविर’’ को रुपमा,संचालन गर्न गइरहेको शिविरले त्यस क्षेत्रका धेरै विरामीहरुलाइ उपचारमा सहजता दिलाउने अपेक्षा अन्तर्राष्ट्रिय धादिङ समाजका महासचिव राजेन्द्र श्रेष्ठले बताउनु भएको छ । यसअघि कोभिडको समयमा अन्तर्राष्ट्रिय धादिङ समाजले करिब ७०० जना भन्दा बढी बिरामी लाई डिजिटल हेल्थ शिबिर मार्फत सेवा प्रदान गरेको थियो।

आर्थिक संयोजक तथा सस्थाका सचिव बाबुकाजी भण्डारीका अनुसार शिविरमा, राष्ट्रिय समन्वय परिषद्हरु अस्ट्रेलिया, अध्यक्ष (अर्जुन केसी) अमेरिका, अध्यक्ष (रामेश्वर बुर्लाकोटी) जापान, अध्यक्ष (श्याम हरि तिमल्सेना) तथा फिनल्याण्ड संयोजक (सुदिप भुषण अर्याल) ले आर्थिक सहयोग जुटाई सहयोग गर्नुभएको छ । साथै एनआरएनए फिनल्याण्ड कि अध्यक्ष, सस्थाका संरक्षक नानु काजि अर्याल, सल्लाकार सुजन अधिकारी लगायत थुप्रै सामाजिक अभियन्ताहरुले पनि आर्थिक सहयोग गर्नुभएको छ ।

शिविर बिहान ९ बजेदेखी अपराह्न ५ बजे सम्म सन्चालन हुने हुँदा स्वास्थ्य समस्या भएका ज्वालामुखी गाउँपालिकाका नागरिकहरुलाई सेवा लिनको लागि अन्तराष्ट्रिय धादिङ समाजले आग्रह गरेको छ। गाउँमै विभिन्न विशेषज्ञ डाक्टरले सेवा दिने शिविर भएकोले सेवा लिनको लागि गाउँपालिकाले स्वास्थ्य परिक्षण गराउन आग्रह गरेको छ।