सार्वजनिक जग्गामा बनेका घरटहरा भत्काउँदै गजुरी गाउँपालिका

धादिङ,७ बैशाख
धादिङको गजुरी गाउँपालिकाले सार्वजनिक जग्गा अतिक्रमण गरेर बनाईएको घर टहरा भत्काउन सुरु गरेको छ । बुधबार गाउँपालिका अध्यक्ष गणेश लाल श्रेष्ठको नेतृत्वमा गजुरी गाउँपालिका वडा नम्बर १ चालिसेमा सार्वजनिक जग्गा अतिक्रमण गरेर बनाईएको घर टहराहरु भत्काईएको हो ।

गजुरी गाउँपालिका वडा नम्बर १ चालिसेमा निर्माण प्रस्ताव गरिएको १५ शैंयाको अस्पताल निर्माण गर्नको लागि अतिक्रमण गरेर बनाईएको घर टहरा भत्काउन सुरु गरीएको अध्यक्ष गणेश लाल श्रेष्ठले जानकारी दिनुभयो । अतिक्रमण गरी बसोबास गरीरहेकाहरुलाई सार्वजनिक सुचना जारी गर्दै खालि गराउन माग गरीएको थियो ।

मिति २०७९ पुस १ गते ३५ दिने सार्वजनिक सूचना जारी जानकारी गरिएको भएपनि अटेर गरी घर टहरा नहटाइएकोले गाउँकार्यपालिकाको मिति २०७९ चैत ३ गते को निर्णयानुसार समेत ७ दिनभित्र घरटहरा हटाउन थप समय दिदाँ पनि पटक पटक दिइएको सूचना लाई अवज्ञा गरिएको हुँदा भत्काउन सुरु गरीएको गाउँपालिकाले जनाएको छ ।

चालिसेमा १५ शैयाको अस्पताल निर्माण कार्य अघि बढाउन जग्गा अतिक्रमण गरि बसोबास गरिरहेका घर तथा टहरा भत्काउने कार्य गरिएको हो । गजुरी गाउँपालिकाको अध्यक्ष गणेश लाल श्रेष्ठको नेतृत्व र प्रमुख प्रशासकिय अधिकृत राजु अधिकारी,वडा अध्यक्ष,कार्यपालिका सदस्य र सुरक्षा निकायका टोली सहितको उपस्थितिमा सार्वजनिक जग्गा अतिक्रमण गरि बसोबास गरिरहेका व्यक्तिहरुको घर तथा टहरा भत्काईएको हो ।