अन्तर्राष्ट्रिय महिला दिवसको अवसरमा सिद्धलेक गाउँपालिकामा महिला सचेतीकरण कार्यक्रम सम्पन्न

धादिङ,२३ फागुन
सिद्धलेक गाउँपालिकामा ११३ औं अन्तर्राष्ट्रिय महिला दिवसको अवसरमा महिला सचेतीकरण कार्यक्रम सम्पन्न भएको छ । ‘लैंगिक समानताको बलियो आधार, सिर्जनात्मक प्रविधिमा महिलाको पहुँचको विस्तार’ भन्ने मूल नारासहित मंगलबार महिला सचेतीकरण कार्यक्रम सम्पन्न भएको हो। नारी आन्दोलनकी अभियन्ता क्लारा जेटकिनले सन् १९११ मार्च ८ का दिन महिला कामदार माथिको श्रम शोषण विरुद्धको आवाज उठाएको दिनको सम्झनामा यो दिनलाई अन्तर्राष्ट्रिय महिला दिवसका रुपमा मनाउन थालिएको हो।

दिवसको अवसरमा बागमती प्रदेश सांसद मायादेवी शर्माले महिला सशक्तीकरण र समानताको विषयमा महिलाको मात्र नभएर समाजकै मुद्धा भएको बताउनुभएको छ । त्यसैगरी सांसद शर्माले हिजोको तुलनामा आजको अवस्थामा धेरै कुराको परिवर्तन आएको र महिला अधिकार कार्यान्वयन गराउन आफ्नै घरदेखि व्यवहार परिवर्तनमा जोड दिनुपर्ने बताउनुभएको छ । त्यस्तै गाउँपालिका अध्यक्ष परशुराम खतिवडाले गाउँपालिकामा महिला पुरुषमा कुनै प्रकारको विभेद हुन नदिने प्रतिवद्धता गर्नुभएको छ।उहाँले महिलालाई सशक्त रूपमा अघि बढ्न आह्वान गर्नुभएको छ ।

महिला अघि नबढेसम्म देश विकास हुन नसक्ने भन्दै उहाँले घरबाहिरको भूमिकामा सक्रिय हुन समेत आग्रह गर्नुभयो । त्यस्तै गाउँपालिका उपाध्यक्ष सविता अर्यालले ८ मार्चमा पर्ने अन्तर्राष्ट्रिय महिला दिवसको बारेमा महिलालाई बुझाउन अझै बाँकी रहेको बताउनुभयो उहाँले सोचमा परिवर्तन नआएसम्म समतामूलक समाज बन्न नसक्ने बताउनुभयो ।

उहाँले घरबाहिर ननिस्केका महिलालाई बाहिर ल्याउन सक्नु पनि परिवर्तन भएको बताउनुभयो । त्यसैगरी महिला अधिकारको मुद्दा उठ्न थालेको लामो समय भइसक्दा समेत अझै पनि महिला र पुरुषबीचको खाडल ठूलो रहेको समेत बताउनुभयो ।

गाउँपालिका अध्यक्ष परशुराम खतिवडाको अध्यक्षता, बागमती प्रदेश सांसद मायादेवी शर्माको प्रमुख आतिथ्यतामा सम्पन्न कार्यक्रममा पालिकाका स्वास्थ्य शाखाका कम्युनिटी नर्सिङ निरिक्षक नविना पौडेलले अन्तर्राष्ट्रिय महिला दिवसको पृष्ठभुमिका विषयमा प्रकाश पार्नुभएको थियो भने राष्ट्रिय भूमि आयोगका अध्यक्ष कृष्ण प्रसाद अर्याल,वडा नम्बर ७ का सानो गिरी लगायतले बोल्नु भएको थियो ।कार्यक्रममा पालिकाको सूचना अधिकारी तथा निमित्त प्रमुख प्रशासकिय अधिकृत हरि पाटा मगरले स्वागत मन्तव्य राख्नुभएको थियो भने कार्यक्रमको सञ्चालन सामाजिक विकास शाखाका सामाजिक विकास अधिकृत विनोद अर्यालले गर्नुभएको थियो।