एकै दिनमा गजुरी पेटारेका ३६ जनाले गरे घटना दर्ता

धादिङ,१६ फागुन ।
गजुरी गाउँपालिका वडा नं.७ पेटारेका एउटै गाउँका ३६ जनाले एकै दिन घटना दर्ता गराएका छन । गजुरी गाउँपालिका वडा नं.७ का वडा अध्यक्ष बद्री प्रसाद जमकट्टेलसँगको समन्वय र सहकार्यका एउटै टोलका ३३ जनाले जन्म दर्ता र ३ जनाले विवाह दर्ता गरेको हो ।
प्रयास नेपाल धादिङ, प्लानेट इन्फान्ट एण्ड डेभलमेन्ट र गजुरी गाउँपालिकाद्धारा संचालित प्रारम्भीक बाल विकासमा लगानी परियोजना अन्र्तगत अभिभावक शिक्षा संचालनमा आएपछि घटना दर्ता गर्न अग्रसर भएका हुन् ।

तामाङ जातिको बसोबास रहेको सो समुदायमा घटना दर्ता गर्नुपर्छ भन्ने कुरा जानकारी नै नभएको विकास तामाङ बताउनुहुन्छ । प्रयास नेपाल धादिङले अभिभावक शिक्षा अन्र्तगत वैठकका घटना दर्ता र त्यसको महत्व बुझाएपछि जन्म दर्ता विवाह दर्ता गर्न अग्रसर भएको प्रयास नेपाल धादिङका कपिलदेव सापकोटाले बताउनुभयो ।

वडा सदस्य विकास तामाङका अनुसार अझै पेटारे गाउँका एक दर्जनभन्दा बढीको घटना दर्ता गर्न बाँकी रहेको छ । प्रयास नेपाल धादिङको जनचेतना मूलक कार्यक्रमकने प्रभावले पनि घटना दर्तामा स्थानीयले चासो देखाएको कार्यकारी निर्देशक दमोदर अर्यालले जानकारी दिनुभयो ।उक्त घटना दर्तामा २ महिनादेखि १८ वर्षसम्मकाले जन्मदर्ता गरेको वडा सचिव लक्ष्मी फुयालले बताउनुभयो । घटना दर्ता गर्नको लागि वडा अध्यक्ष बद्री प्रसाद जमकट्टेलले यातायातको व्यवस्था समेत गर्नुभएको थियो ।